పార్లమెంటు నుండి అసెంబ్లీకి షిఫ్టింగ్

Posted: 08/14/2013 04:52 PM IST

మాజీ నటి, ప్రస్తుత రాజకీయ నాయకురాలు , మెదక్ ఎంపీ అయిన తెలంగాణ రాములమ్మ విజయశాంతి ఇటీవలే టీఆర్ఎస్ పార్టీ నుండి బహిష్కరణకు గురై, ప్రస్తుతం కాంగ్రెస్ పార్టీ తీర్థం పుచ్చుకోవడానికి సిద్దంగా ఉంది. టీఆర్ఎస్ పార్టీ నుండి పోటీ చేసిన రాములమ్మ కాంగ్రెస్ పార్టీ నుండి వచ్చే ఎన్నికల్లో అసెంబ్లీకి పోటీ చేయబోతుందా ? ఇన్ని రోజుల నుండి మెదక్ ఎంపీ సీటు నాదే అని, దాని నుండి నన్ను ఎవరూ తప్పించలేరని, దాని పై కన్నేస్తే బాగుండదని పరోక్షంగా టీఆర్ఎస్ అధినేతకే వార్నింగ్ ఇచ్చిన రాములమ్మ ఇప్పుడు వెనక్కి తగ్గిందని అంటున్నారు. ఈమె పార్టీలో ఉండగా కేసీఆర్ మెదక్ ఎంపీ సీటు నుండి ఈమెను తప్పించి, తను కానీ వేరే వారికి కేటాయించాలని భావించి పలువురి ఆశావాహులకు హామీలు ఇవ్వడంతో విజయశాంతి తట్టుకోలేక పోయింది. ఈ మధ్యన పార్టీతో విభేధాలు ఏర్పడటం, తెలంగాణ ఇచ్చేస్తున్నామంటూ కాంగ్రెస్ ప్రకటించడంతో పరిస్థితులు మారాయి. దీంతో ఈమె బెట్టు వీడి అసెంబ్లీ నుండి కాంగ్రెస్ తరుపున పోటీ చేయడానికి సుఖం వ్యక్తం చేసినట్లు సన్నిహిత వర్గాల సమాచారం. 2014 ఎన్నికల లోపు కాంగ్రెస్ పార్టీ తెలంగాణ రాష్ట్రం ఏర్పాటు చేస్తే టీఆర్ఎస్ పార్టీ కాంగ్రెస్ లో విలీనం కావడం ఖాయం. అలాంటి నేపథ్యంలో రాష్ట్రంలో కాంగ్రెస్ ప్రభుత్వం ఏర్పాటు చేయడం పెద్ద విషయం కాదనే భావన అందరిలో ఉంది. కేంద్రంలో యూపీఏ అధికారంలోకి వస్తుందో రాదో అనే విషయం క్లారిటీ లేదు. కాబట్టి రాష్ట్రం నుండి పోటీ చేస్తే ఏదో ఒక మంత్రి పదవితో హాయిగా ఐదు సంవత్సరాలు వేలాడవచ్చనే ఆలోచనలో విజయశాంతి ఉన్నట్లు తాజా ఇన్ ఫర్మేషన్.  ఒక వేళ టీఆర్ఎస్ విలీనం అయి, కేసీఆర్ మెదక్ ఎంపీ సీటు ఆశిస్తే... వీరిద్దరికి ఎలాంటి జంజాటం లేకుండా ఉంటుంది కాబట్టి కాంగ్రెస్ పార్టీ అధిష్టానం కూడా విజయశాంతి ప్రతిపాదనకు సుముఖంగానే ఉన్నట్లు చెబుతున్నారు. మరి రాములమ్మ మంత్రి అవుతుందో, కేంద్ర మంత్రిగా పార్లమెంటులో అడుగు పెడుతుందో వేచి చూడాల్సిందే.