Posted: 08/26/2012 02:16 PM IST

        2014 ఎన్నికల చిత్రం దగ్గరవుతున్న కొద్దీ రాష్ట్రంలో రాజకీయ పార్టీల మధ్య కొత్త పొత్తులకు తెరవెనక యత్నాలు మొదలవుతున్నాయి. ముఖ్యంగా సమైక్య నినాదంతో ముందుకు సాగుతున్న సీపీఎం పార్టీ వైఎస్సార్ కాంగ్రెస్ పార్టీకి దగ్గరవుతోంది. పాత మిత్రపక్షం టీడీపీ, తోటి వామపక్ష పార్టీ సీపీఐకి దూరబవుతోంది. తెలంగాణ గురించి సీపీఐ గట్టిగా ఉండడం సీపీఎంకు నచ్చడంలేదు. సమైక్య పార్టీ అయిన సీపీఎంకు తెలంగాణలో స్థానం ఖాళీ అయినట్లే. ఇక సీమాంధ్రలో టీడీపీ పట్టు కోల్పోయినట్లు గమనించిన సీపీఎం తమకు సరిజోడి జగన్ అని ఆ దిశగా పావులు కదుపుతోంది.
      ఈ మేరకు సీపీఎం జగన్ పార్టీతో పొత్తుకు సంబంధించి సీట్ల సర్ధుబాటు వ్యవహారం ఓ అవగాహనకు వచ్చినట్లు తెలుస్తోంది. కృష్ణా డెల్టాకు నీరు విడుదల చేయాలని టీడీపీ శనివారం విజయవాడలో మహాధర్నా చేసింది. దీనికి సీపీఐ మద్దతు పలికితే సీపీఎం దూరంగా ఉంది. ఈ మేరకు సీపీఎం రాష్ట్ర కార్యదర్శి రాఘవులు మాట్లాడుతూ తెలంగాణ టీడీపీ నాయకులు నీళ్లు వదలవద్దు అని అంటుంటే, టీడీపీ నీళ్లకోసం ధర్నా చేస్తుందని, ఇలాంటి అవకాశ వాద రాజకీయాలకు దూరంగా ఉంటామని అన్నారు. ఇటీవల జరిగిన ఉప ఎన్నికల్లోనూ సీపీఎం ఒంటరిగా పోటీ చేసింది తప్పితే టీడీపీకి మద్దతు ఇవ్వలేదు. నీరు విడుదల చేయొద్దన్న పార్టీలు ఇప్పుడు ఆందోళన చేస్తున్నాయని రాఘవులు విమర్శించారు.
         సీపీఐ తెలంగాణ ఉద్యమానికి మద్దతు ఇస్తున్న నేపథ్యంలో ఆ పార్టీకి భవిష్యత్ కు తెలంగాణలో ఢోకా లేకుండా పోయింది. అయితే సీపీఎంకు తెలంగాణలోనే పట్టుంది. ప్రస్తుతం ఉన్న ఒక్క స్థానం మిర్యాలగూడ గత ఎన్నికల్లో పొత్తు నేపథ్యంలో దక్కింది. ఈ సారి ఆ అవకాశమూ లేదు. అందుకే సీమాంధ్రలో పట్టున్న జగన్ పార్టీతో ఇప్పుడే అవగాహనకు వస్తే శాసనసభలో కనీసం ప్రాతినిధ్యం అన్నా దక్కుతుందని భావిస్తున్నట్లు తెలుస్తోంది.

...avnk