Posted: 08/25/2012 04:40 PM IST

మన రాష్ట్ర పీసీసీ అధ్యక్షుడు బొత్స సత్యనారాయణ ఢిల్లీలో పరిస్థితి చూస్తే జాలేస్తుందంటున్నారు రాజకీయ నాయకులు. ‘దేవుడి దగ్గరకికి వెళ్లి దర్శనం చేసుకోలేని విధంగా ఉందంటున్నారు ఆయన పరిస్థితి. పీసీసీ అధ్యక్షునిగా కొత్త వారిని నియమించాలని అధిష్టానం ఆలోచన చేస్తుందన్న సమాచారం అందుకొని ఐదు రోజుల ముందు ఢిల్లీకి వెళ్ళిన బొత్స సత్యనారాయణకు అక్కడ చేదు అనుభవాలే ఎదురయ్యాయి. ఆయనను అక్కడ పట్టించుకున్న వారే కరువయ్యారు. యన ఐదు రోజుల పాటు ఢిల్లీలో ఉన్నా కాంగ్రెసు అధ్యక్షురాలు సోనియా గాంధీని కలువలేకపోయారు. 10 - జనపథ్‌లో గానీ, పార్లమెంటు సెంట్రలో హాల్‌లో పార్లమెంటరీ పార్టీ కార్యాలయంలో గానీ బొత్స సత్యనారాయణకు సోనియా గాంధీ దర్శనం కాలేదు. ఆయన పార్టీ అధిష్టానానికి చెందిన ఇతర పెద్దలతో మాత్రమే సమావేశమయ్యారు.

పీసీసీ అధ్యక్షుడు అంటే రాష్ట్ర కాంగ్రెస్ నాయకులను అందర్ని ఒకే తాటి పై నడిపించే వ్యక్తి. అలాంటి వ్యక్తికి కనీసం కాంగ్రెస్ అధ్యక్షురాలి దర్శనమే కాలేదు. గతంలో పీసీసీ అధ్యక్షులుగా ఉన్న కేశవరావు, డి. శ్రీనివాస్ లాంటి వారు ఢిల్లీకి వెల్లిన ప్రతిసారీ సోనియాని కలిసి ఇక్కడి పరిస్థితి వివరించి సలహాలు తీసుకునేవారు. మరి అంత ప్రాధాన్యం ఉన్న పోస్టులో ఉన్న బొత్సకు మాత్రం ఐదు రోజుల నుండి అమ్మ దర్శనమే ఇవ్వలేదు. అదే మొన్న మధ్యాహ్నాం ఢిల్లీకి వెళ్లిన కిరణ్ కుమార్ రెడ్డితో ఆమె గంటకు పైగా చర్చలు జరిపారు.బొత్స మాత్రం కాంగ్రెసు అధిష్టానానికి చెందిన వాయలార్ రవి, గులాం నబీ ఆజాద్, అహ్మద్ పటేల్‌లను మాత్రమే కలిశారు. గురువారం మధ్యాహ్నం కిరణ్ కుమార్ రెడ్డి ఢిల్లీలో అడుగు పెడితే శుక్రవారం మధ్యాహ్నం బొత్స సత్యనారాయణ ఆయనను ఐదు నిమిషాల పాటు కలిసి వెళ్లిపోయారు. దీన్ని బట్టి ఇరువురి మధ్య అగాధం మరింత పెరిగినట్లు కనిపిస్తోంది.

ఢిల్లీ రాజకీయ వర్గాల వారు మాత్రం బొత్స సత్యనారాయణను కాంగ్రెస్ అధినేత్రి నమ్మడం లేదని, తన ఇష్టం వచ్చినట్లు వ్యవహరించడం, కాంగ్రెస్ నాయకులను ఒక తాటి పైకి తేకపోవడం వల్లనే బొత్సకు అధినేత్రి దగ్గర ఆదరణ తగ్గిందని అందుకే తనకు నమ్మకం అనిపించే వ్యక్తుల దగ్గరి నుండి సమాచారాన్ని సేకరిస్తుందని అంటున్నారు. బొత్స సత్యనారాయణకు ఆంగ్లభాష సమస్య కూడా అందుకు కారణమని అంటున్నారు. తనకు ఇంగ్లీషు రానందున ఆమెతో ఏం మాట్లాడుతున్నాడో అర్థంకాక ఆమె ఆయనకు దర్శనం ఇవ్వడం లేదని అంటున్నారు.