Posted: 07/27/2012 03:16 PM IST

       కాంగ్రెస్ పార్టీ యువరాజు రాహుల్  గాంధీని అల్లుడుగా చేసుకోవాలని ఎవరికి మాత్రం ఉండదు? అన్నీ కలిసివస్తే ఆయన రేపటి భావి ప్రధాని కూడా. రాహుల్  తన కూతుర్ని పెళ్లాడితే 15కోట్లు కట్నం ఇస్తానంటోంది ఓ మహిళ. అంతటితో ఊరుకోకుండా తన డిమాండ్ ను సాధించుకునేందుకు ఆమె ఏకంగా నిరవధిక నిరాహార దీక్షకే దిగింది. ఏమిటా కథ అంటారా? ఆ మహిళ పేరు ఓం శాంతి శర్మ. చెదురుమదురు వర్షాలను కూడా ఖాతరు చేయకుండా ఆమె జంతర్ మంతర్ వద్ద నిరవధిక దీక్ష సాగిస్తోంది. మౌనంగానే భగవంతుడికి ప్రార్థనలు చేస్తోంది. ఇంతకూ ఆమె మనోగతం ఏమై ఉంటుంది? అందరు తల్లులూ కోరుకున్నట్టే ఆమె కూడా తన కూతురికి ఒక మంచి భర్తను చూపించాలంటూ ప్రార్థనలు చేస్తోంది. ఇందులో విశేషం ఏమీ లేకపోవచ్చు. అయితే ఆమె కోరికలో ఓ ప్రత్యేకత మాత్రం ఉంది.
   కాంగ్రెస్ యువనేత, పార్టీ ప్రధాన కార్యదర్శి రాహుల్ గాంధీ తన కూతుర్ని పెళ్లాడాలని ఆమె కోరుకుంటోంది. రాహుల్ ఈ పెళ్లికి ఒప్పుకుంటే 15కోట్ల రూపాయలు కట్నం కూడా ఇస్తానంటోంది. మౌనవ్రతంలో ఉన్నందున ఆమె తన డిమాండ్లను నోటితో చెప్పకుండా ఓ ప్లకార్డుపై రాసి పెట్టి మరీ దీక్షకు కూర్చుంది. ప్లకార్డులో ఉన్న సమాచారం చూస్తే ఓం శాంతి శర్మ స్వస్థలం రాజస్థాన్ రాజధాని జైపూర్. అత్తమామలు, తల్లిదండ్రుల ఆస్తిలో తనకు వాటా ఇవ్వాలని కూడా ఆమె డిమాండ్ చేస్తోంది. మౌనవ్రతంలో ఉండటంతో ఆమె మాట్లాడటం కానీ లిఖితపూర్వక సమాధానం ఇవ్వడం కానీ చేయడం లేదని, రోజంతా ఇక్కడే కూర్చుని ప్రార్థనలు చేస్తోందని ప్రత్యక్ష సాక్షులన్నారు.  కాగా ఆమెకు మతిస్థిమితం లేనట్టు కనిపిస్తోందని దీక్షకు అనుమతి కూడా తీసుకోలేదని పోలీసులు చెబుతున్నారు. దీనిపై వ్యాఖ్యానించేందుకు న్యూఢిల్లీ రేంజ్ అడిషనల్ డీసీపీ మాత్రం నిరాకరిస్తున్నారు.

...avnk