Posted: 05/07/2012 03:51 PM IST

మల్టీస్టారర్ సినిమా టైటిల్ అంటే ఎలా ఉండాలి? రామకృష్ణులు, సత్యం శివం, కృష్ణార్జునులు, ఇద్దరు దొంగలు, అడవి సింహాలు... ఈ రేంజ్‌లో ఉండాలి. మరి ‘సీతమ్మ వాకిట్లో సిరిమల్లె చెట్టు’ ఏంటి?... పైగా వెంకటేష్, మహేష్ లాంటి టాప్ స్టార్లను పెట్టి ఈ సాఫ్ట్ టైటిల్ ఏంటి?... గత కొద్ది రోజులుగా ప్రేక్షకుల మదిలో మెదులుతున్న ప్రశ్నలివి. వీటికి సమాధానం తెలుసుకోవాలంటే... అక్టోబర్ దాకా ఆగాల్సిందే అంటున్నారు దర్శకుడు శ్రీకాంత్ అడ్డాల. ‘‘వెంకటేష్, మహేష్‌లు మాత్రమే కాదు. వీరిద్దరినీ మించిన మరో హీరో ఉన్నాడు మా సినిమాలో. ఆ హీరో ఎవరో కాదు... కథ. పూర్తిగా కథపై ఆధారపడి తెరకెక్కిస్తున్న సినిమా ఇది. కథానుగుణంగానే హీరోలను కూడా ఎంచుకున్నాం.

అదృష్టవశాత్తు వెంకటేష్, మహేష్ లాంటి సూపర్ స్టార్లు మాకు దొరికారు. మాయాబజార్, మిస్సమ్మ, గుండమ్మ కథ చిత్రాలు కూడా మల్టీస్టారర్లే. కథానుగుణంగా వాటికి టైటిల్స్ పెట్టారు. అందుకే అవి క్లాసిక్స్ అయ్యాయి. వాటిని ఆదర్శంగా తీసుకొని తెరకెక్కిస్తున్న సినిమా ఇది. ప్రతి ఒక్కరూ తమ ఇంటి విషయంలో బాధ్యతగా వ్యవహరిస్తే... సమాజానికి మంచి చేసినట్టే లెక్క అని తెలిపే గొప్ప కథాంశంతో ఈ సినిమా తెరకెక్కుతోంది. ఇందులో వెంకటేష్, మహేష్ అన్నదమ్ములుగా నటిస్తున్నారు. సమంత, అంజలి కథానాయికలు. వారి పాత్రలు కూడా కథకు కీలకమైనవే. ఇందులో ఒక్క పాత్ర కూడా వృథాగా ఉండదు. ఒక్క సీన్ వేస్ట్‌గా ఉండదు. అంత పగడ్బందీ స్క్రీన్‌ప్లేతో సినిమాను రూపొందిస్తున్నాం. దిల్ రాజు ఎంతో ప్రతిష్టాత్మకంగా తీసుకొని ఈ సినిమాను నిర్మిస్తున్నారు.