Posted: 04/24/2012 05:54 PM IST

ప్రస్తుతం కాంగ్రెస్ లో ఉన్న పరిస్థితులను బట్టి చూస్తే మరి కొద్ది రోజుల్లో రాష్ట్రంలో పెనుమార్పులు సంభవించబోతున్నాయని తెలుస్తుంది. ఈ నేపథ్యంలో ప్రస్తుత ముఖ్యమంత్రి, పీసీసీ ఛీఫ్ పదవుల్లో మార్పులు కూడా జరగబోతున్నాయని అనధికార వర్గాల సమాచారం. మొన్నటికి మొన్న రాష్ట్రానికి కేరళ వైద్యం చేయడానికి వచ్చి వెళ్ళిన వాయలార్ రవి కూడా మేడమ్ సోనియాగాంధీతో ప్రత్కేక భేటీలు జరిపి తన నివేదికను సమర్పించాడు. ఈయన రిపోర్ట్ ప్రకారం రాష్ట్రంలో ముఖ్యమంత్రి, పీసీసీ చీఫ్‌ ఇద్దరినీ మార్చాలని, తెలంగాణకు సీఎం, సీమాంధ్రలో కాపు నేతకు పీసీసీ అధ్యక్ష పదవి ఇవ్వాలని సిఫారసు చేసినట్లు పార్టీ వర్గాల సమాచారం.

ఈ నేపధ్యంలో కాంగ్రెస్ లో కావు వర్గానికి చెందిన ఇద్దరు మఖ్యనేతల పేర్లు తెరపైకి వస్తున్నాయి. అందులో ముఖ్యంగా చిరంజీవి, వ్యవసాయశాఖ మంత్రి కన్నా లక్ష్మీనారాయణ పేర్లు వినిపిస్తున్నాయి. కాపులలో చరిష్మా ఉన్న నేతలు వీరే. వీరిలో ఒకరికి సినీ గ్లామర్ ఉంటే, మరొకరికి రాజకీయ అనుభవం గ్లామర్ ఉంది. ప్రస్తుతం కాంగ్రెస్ ని కాస్తో కూస్తో అతలాకుతలం చేస్తున్న వైయస్ జగన్ ని ఎదుర్కోవడానికి చిరు అయితేనే కరెక్ట్ అని అధిష్టానం ఓ నిర్ణయానికి వచ్చినట్లు తెలుస్తుంది. చిరంజీవికి పీసీసీ పదవి ఇవ్వడం వల్ల ప్రచారంలో జగన్ కు సమానమైన ప్రచారం పొందటంతో పాటు, జగన్ ని ఎదుర్కొనే సత్తా ఉన్న ఏకైక లీడర్ చిరు అనే ప్రచారం పార్టీ వర్గాల్లో నుండి రాడంతో అధిష్టానం కూడా చిరు వైపే ఎక్కువ మొగ్గు చూపుతున్నారని పార్టీ వర్గాల సమాచారం.

అంతే కాకుండా ఈ మధ్య కాలంలో జగన్ పై, ఆయన తండ్రి పై ఎన్నో సందర్భాల్లో విరుచుకుపడ్డారు. దానికి అటు నుండి ఎలాంటి విమర్శలు రాకపోవడంతో... అధిష్టానం కూడా ఏ విధమైన ఆరోపణలు లేని చిరంజీవి అయితే కరెక్ట్ అనే ఉద్దేశ్యంతోనే ఉందని అంటున్నారు. ముఖ్యంగా కాపు వర్గానికి చెందిన చిరంజీవికి పదవి ఇస్తే కాపులు కూడా కాంగ్రెస్ వైపు వస్తారని భావిస్తుంది. ఇటు సినీ గ్లామర్ అటు తన కుల వర్గం ఇటు జగన ని ఎదుర్కోనే సత్తా... ఇవన్నీ చూసే చిరుకి కట్టబెట్టాలని పార్టీ అధిష్టానం ఆలోచనలో ఉన్నట్లు వార్తలు.

మరోవైపు సీనియర్‌ మంత్రి కన్నా లక్ష్మీనారాయణ పేరు కూడా పరిశీలిస్తోంది. ఏ పని చేసినా అది పార్టీ కి లాభం కలిగేలా ఉండాలన్న కోణంలో వాదించే కన్నాకు, పీసీ సీ అధ్యక్ష పదవి ఇచ్చినందువల్ల పార్టీకి సమర్ధవంతమైన నాయ కత్వం లభించినట్టవుతుందని భావిస్తుంది. అంతే కాకుండా కోస్తాలో విస్తృతమైన యంత్రాంగం, పార్టీ శ్రేణుల్లో ఇమేజ్‌ దండిగా ఉన్న నాయకుడిగా పేరున్నందున ఈయనను కూడా నియమించే ఆలోచనలో ఉన్నారని ఆ పార్టీ వర్గాల సమాచారం. మరి ఈ ఇద్దరిలో చిరుకే ఎక్కువ అవకాశాలు ఉన్నా పీసీసీ పదవి ఎవరిని వరిస్తుందో చూడాలి.