Posted: 03/04/2012 02:39 PM IST

జగన్ నివాసంలో అర్థరాత్రి నుంచీ కలకలం సృష్టించిందెవరు. అందరికీ ఫోన్లలో ఎస్ఎమ్ఎస్ లు పంపించిందెవరు. ఏమాశించి చేసారు. మరి వారు అనుకున్నది సాధించారా.

జగన్ ని సిబిఐ అదుపులోకి తీసుకోబోతున్నదన్న పుకార్లను నమ్మవద్దని వైయస్ఆర్ కాంగ్రెస్ పార్టీ అధికార ప్రతినిధి అంబటి రాంబాబు ప్రకటించారు. కార్యకర్తలు ఆందోళన చెందవలసినపని లేదుని, జగన్ మీద ఒక చెయ్యి పడితే వెయ్యి చేతులు లేస్తాయని, ఆధారాల్లేకపోవటం వలనే సిబిఐ మీనమేషాలు లెక్కిస్తోందని అంబటి మీడియాలో అన్నారు.

కలకలం మంచిదే. వార్తలలోకి ఎక్కటానికి పనికివస్తుంది. ఇదో రకమైన ప్రచారమే. చేసిందెవరైనా వైయస్ఆర్ సిపికి మంచే జరిగింది. అన్నను రక్షించుకుందామన్న పిలుపు ఎస్ఎమ్ఎస్ లో రాగానే అధిక సంఖ్యలో కార్యకర్తలు రావటం, హడావిడి జరగటంతో మీడియా దృష్టంతా అటువైపే మళ్ళింది.

దానితో పాటు అంబటి రాంబాబు సవాళ్ళు ఫలితమిచ్చి నిజంగా అరెస్ట్ కి దారితీస్తే అది కూడా మంచిదే. రాజకీయాల్లో ఉపయోగించుకునే నేర్పుండాలి కానీ దేన్నైనా పార్టీ ప్రయోజనానికి, ప్రజల్లో సద్భావన పెంచుకోవటానికి ఉపయోగపడేట్టుగా చేసుకోవచ్చు.   దివంగత నేత వైయస్ ఆర్ మృతితో జగన్ పట్ల వచ్చిన సానుభూతి తరంగం క్రమంగా సన్నగిల్లుతున్న తరుణంలో జగన్ ని అరెస్ట్ చేస్తే మరోసారి సానుభూతి ఉప్పెనలా పొంగే అవకాశం ఉండవచ్చు కాబట్టి అంబటి రాంబాబు ఎంత కవ్వించినా, ప్రభుత్వం అటువంటి పని చెయ్యదనే చెప్పాలి.

కానీ తనని అరెస్ట్ చేస్తేనే బాగుంటుందేమోనని జగన్ ఆశిస్తున్నారని రాజకీయరంగంలో చెప్పుకుంటున్నారు.

-శ్రీజ