Posted: 02/16/2012 04:43 PM IST

అలహాబాద్ శివారులోని పూల్ పూర్ గురించి ఇప్పటితరానికి పెద్దగా తెలిసి ఉండకపోవచ్చు. 1950-60ల్లో దేశవ్యాప్తంగా ఇంటింటా తెలిసిన ఊరిపేరది. భారత ప్రథమ ప్రధాని జవహార్లాల్ మూడు సార్లు పూల్ పూర్ నుంచి లోక్ సభకు ప్రాతినిథ్యం వహించారు. అదే ఊరి నుంచి శాసనసభకు పోటీ చేస్తున్న కాంగ్రెస్ అభ్యర్థి మషూఖ ఖాన్ విజయం సాధిస్తారని ఆ పార్టీ నేతలకే ఆశల్లేవు. ఆయన ధనవంతుడైన వ్యాపారవేత్త. కొత్తగా రాజకీయాల్లో తమ జాతకాన్ని పరీక్షించుకోవడానికి వచ్చారు. పోటీ ప్రధానంగా భాజపా అభ్యర్థి జొక్కులాల్ యాదవ్, బీఎస్పీ అభ్యర్థి ప్రవీణ్ పటేల్ మధ్య ఉంటుందని అంచనా వేస్తున్నారు.

నెహ్రూ పూల్ పూర్ లో స్వయంగా ఏడున్నర ఎకరాల్లో తొలితరం పారిశ్రామికవాడ ఏర్పాటు చేశారు. ఇక్కడ పింగాణీ వస్తువులు , నాప్తలిన్ ఉండల తయారీ వంటి పరిశ్రమలు వర్థిల్లాయి. దేశ విదేశాలకు ఎగుమతులతో నగరం కళకళ లాడేది. ఇప్పుడు ఒకటి అరా పరిశ్రమలు మిగిలాయి.

కరెంటు ఉండుదు. రోడ్లు ఘోరం. ప్రస్తుతం పరిశ్రమలకు 4 గంటలకు మించి కరెంటు ఇవ్వడం లేద. దూకాణాల్లో కూడా నిత్యం జనరేటర్లు మోగుతూనే ఉంటాయి. మరో మూడెకరాల్లో నెహ్రూ ఏర్పాటు చేసిన కుటిర పరిశ్రమల సముదాయం కూడా మూతబడి పోయింది. ఇక్కడ నూలు, పట్టు దారాలు, సబ్బులు, ఖాదీ వస్త్రాలు తయారయ్యేవి. ఇప్పుడు అక్కడ మొండి గోడలు మిగిలాయి. ప్రస్తుతం ఇక్కడి యువత ఉపాది కోసం దేశవ్యాప్తంగా పెద్ద నగరాలకు వలస వెళుతున్నారు. తమ ఊరు బాగు కావాలంటే, ఉపాది కోసం అల్లాడుతున్న యువత మొహంలో ఆనందాలు వెల్లివిరియాలంటే మరో నెహ్రూ దిగిరావాలని పాతతరం ఓటర్లు అంటున్నారు. రెండు దశాబ్ధాలుగా కులం ప్రాతిపదికన ఓటేయడం తమకు అలవాటుగా మారిందని అంగీకరిస్తున్నారు.