Posted: 03/26/2013 07:43 PM IST

కొమ్ములు తిరిగిన కాంగ్రెస్ పార్టీతో పెట్టుకుంటే  ఏం జరుగుతుందో  కొన్ని రాజకీయ పార్టీలకు ఇప్పటికే   అర్థమై ఉంటుందని   కాంగ్రెస్ పార్టీ సీనియర్ నాయకులు అంటున్నారు.  కాంగ్రెస్ పార్టీ మీద కత్తులు, కారాలు, మిరియాలు నూరిన వారికి ఏం జరుగుతుందో  మన కళ్లముందే తెలుస్తోంది. కాంగ్రెస్ పార్టీతో  కయ్యానికి కాలుదువ్విని .. వైఎస్ జగన్ పరిస్థితి ఏమిటి?  ఇప్పటి వరకు బెయిల్ రాకుండా.. చంచల్ గూడ జైల్లో  విశ్రాంతి తీసుకుంటున్న విషయం తెలిసిందే.  అలాగే కాంగ్రెస్ పార్టీతో కటిఫ్ చేసుకున్న  ఎంఐఎం సోదరులకు పట్టపగలే  చుక్కలు చూపింది  కాంగ్రెస్ పార్టీ.  ఆ పార్టీకి నేతలకు వరుస అరెస్టులతో  అన్నదమ్ములకు గడ్డం గీసుకొనే సమయం కూడా చిక్కకుండా ఉక్కిరిబిక్కిరి చేసి...  చివరకు  తన గుప్పిట్లో  పెట్టుకుంది  కాంగ్రెస్ పార్టీ.   అమ్మ దర్శనం తరువాతనే  ఆ పార్టీకి  అరెస్టు తగ్గినట్లు తెలుస్తోంది.  ఇప్పుడు కాస్తా  ఊపిరి పీల్చుకుంటున్నారు ఆ సోదలిద్దరు.  అయితే ఇప్పుడు  ఆపార్టీతోనే  తెలుగుదేశం పార్టీకి తెరదించేప్రయత్నం  చేస్తుంది కాంగ్రెస్ పార్టీ. కాంగ్రెస్‌తో విభేదాలు చెలరేగిన నేపథ్యలో మజ్లిస్ పార్టీ టీడీపీకి మద్దతు పలుకుతుందని అంతా భావించారు. లేదా... టీడీపీ మద్దతుతో తానే ఓ అభ్యర్థినిని నిలుపుతుందనే ప్రచారం కూడా జరిగింది. ఎమ్మెల్సీ ఎన్నికల్లో ఉమ్మడి అభ్యర్థిని నిలపడంపై టీడీపీ, మజ్లిస్ మధ్య కొన్నాళ్లు చర్చలు కూడా జరిగాయి. కానీ... అనూహ్యంగా కాంగ్రెస్ పార్టీ ఎంఎస్ ప్రభాకర్‌ను రెండో సారి ఎంఎల్‌సీ అభ్యర్థిగా ఖరారు చేయడంతో మజ్లిస్-తెలుగుదేశం పార్టీల మధ్య చర్చలకు తెరపడింది.

 

 గతంలో మజ్లిస్ అభ్యర్థిగా సయ్యద్ అమీనుల్ హస్సన్ జాఫ్రీ ఎమ్మెల్సీగా ఎన్నికైనప్పుడు... ప్రభాకర్‌కు భవిష్యత్తులో తమ మద్దతు ఉంటుందని అసదుద్దీన్ హామీ ఇచ్చినట్లు తెలిసింది. ఇప్పుడు కాంగ్రెస్ వ్యవహారం చెడినప్పటికీ... జీహెచ్ఎంసీ మేయర్ స్థానంలో మాత్రం పరస్పర ఒప్పందం ప్రకారం ప్రస్తుతం ఎంఐఎం నేత కొనసాగుతున్నారు. జీహెచ్ఎంసీలో కాంగ్రెస్, ఎంఐఎంలకు ఉన్న బలం దృష్ట్యా ఇద్దరు ఎమ్మెల్సీలు ఎన్నికయ్యే అవకాశముంది. గతంలో ఎంఐఎం తరఫున సయ్యద్ జాఫ్రీ ఎంపిక అయినందున... ఇప్పుడు ప్రభాకర్‌కు మద్దతు పలకడమే సమంజసమని అసదుద్దీన్ భావించినట్లు తెలిసింది. దీంతోపాటు భవిష్యత్ పరిణామాలు కూడా దృష్టిలో పెట్టుకున్నట్లు సమాచారం. ఏదైతేనేం... ఈ ఎన్నికల్లో ఎంఐఎం తన అభ్యర్థిని నిలపలేదు. ఇంకెవరూ నామినేషన్లు దాఖలు చేయకపోవడంతో కాంగ్రెస్ అభ్యర్థి ప్రభాకర్ ఏకగ్రీవంగా ఎన్నిక కావడం ఖరారైపోయింది.   దీంతో తెలుగుదేశం  ఎంఐఎం పార్టీలు  బలపడే సమయంలో  కాంగ్రెస్ పార్టీ ఆడిన డబుల్ గేమ్ లో  తెలుగుదేశం పార్టీకి పట్టపగలే  చుక్కలు కనిపించినట్లు  కాంగ్రెస్ పార్టీ సీనియర్ నాయకులు అంటున్నారు.  ఎంఐఎం పార్టీ నాయకుల నోట  టీడిపి పదం రాకుండా చేసిందని   కాంగ్రెస్ నాయకులు గాంధీ భవన్ లో  చెప్పుకుంటున్నారు.