Posted: 03/11/2013 04:54 PM IST

తెలుగు దేశం పార్టీలో దాడి వీరభద్రరావు తనకి శాసన మండలి సభ్యత్వ కొనసాగింపుకు అవకాశం ఇవ్వనందుకు పార్టీ అధినేత మీద ఎదురు దాడి చేసారు. 

నిన్న తెలుగుదేశం పార్టీ ఖరారు చేసిన ఎమ్మెల్సీ లలో దాడి వీరభద్రరావు పేరు లేనందుకు ఆయన ఘాటుగా స్పందించారు,  తనకి ముందుగానే చెప్పనందుకు మనస్తాపాన్ని వ్యక్తం చేస్తూ, బిసిలకు అన్యాయం జరుగుతోందని అన్నారు.  తన విషయంలోనే ఇలా జరిగితే మిగతా వాళ్ళ సంగతేమిటని ఆయన ప్రశ్నించారు.  దాడి వీరభద్రరావుతో పాటు ఆయన మద్దతుదారులు కూడా రాజీనామాలు చేస్తామని అన్నారు.  

కోపమొస్తే, అనుకున్నది జరగకపోతే ఎంత మాటయినా అంటారనటానికి తార్కాణంగా, చంద్రబాబు 2000 కిలోమీటర్ల పాద యాత్ర చేసి లాభమేమిటి, పార్టీని 3000 కిలోమీటర్లు వెనక్కి తీసుకొచ్చారు అన్నారాయన.  ఇలాంటి వ్యాఖ్యానాలు ఇతర పార్టీలు చేస్తుంటాయి కానీ అదే పార్టీలో సీనియర్ నేత అలా మాట్లాడటం ఆ పార్టీ శ్రేణులకు బాధను, ఇతర పార్టీలకు సంతోషాన్ని కలుగజేస్తాయి.  

కానీ చంద్రబాబు దాడి మాటలను సమర్థించారు.  ఆ స్థానంలో ఎవరున్నా అలాగే స్పందిస్తారన్నారాయన.  పనిచేసే వాళ్ళకు అందుకు అవకాశం కోసం చూడటం తప్పు కాదన్నారు.  అయితే, సామాజిక న్యాయం దృష్ట్యా తీసుకున్న నిర్ణయమని, అందరికీ అవకాశం లభించాలి కాబట్టి ఎంతో ఆలోచించిన మీదటనే అలా జరిగిందని, పార్టీలో దాడి వీరభద్రరావు చాలా సేవ చేసారని,  కానీ ఇంకా ఎందరో త్యాగాలు చేసినవారున్నారని చంద్రబాబు అన్నారు.

-శ్రీజ