Posted: 11/22/2012 12:53 PM IST

నందమూరి నట సింహం బాలక్రిష్ణ తన కెరియర్లో (వంద సినిమాలు) సెంచరీ కొట్టేందుకు దగ్గరగా వచ్చాడు. ఈ మధ్యన వచ్చిన శ్రీమన్నారాయణ సినిమాతో 97 సినిమాలు పూర్తి చేసుకున్నాడు. ఈ చిత్రం తరువాత రెండు చిత్రాలు చేస్తే 100వ చిత్రం. ఈ చిత్రం కోసం ఇప్పటి నుండే సన్నాహాలు మొదలు పెట్టాడు. తన వందవ చిత్రాన్ని తన కెరియర్లోనే బిగ్గెస్ట్ హిట్ గా, తెలుగు ఇండస్ట్రీలో ఒక ఆణిముత్యంగా నిలిచిపోయే విధంగా ఉండేందుకు ప్లాన్ చేస్తున్నాడు. అయితే దీనికి ఎవర్ని నిర్మిస్తారు ? ఎవరు దర్శకత్వం వహిస్తారు అనే దాని పై గత కొన్ని రోజుల నుండి సందేహాలు నెలకొన్నాయి సినీ ఇండస్ట్రీలో. గతంలో రాజమౌళి దర్శకత్వం వహిస్తున్నాడని వార్తలు వచ్చాయి. కానీ ఆయన క్లారిటీ ఇవ్వడంతో అవి గాలి వార్తలే అని తేలిపోయింది. అయితే ఆ చిత్రానికి దర్శకుడు ఖరారైనట్లే అని తెలుస్తోంది. ఆ దర్శకుడు మరెవరో కాదు.. రాఘవేంద్రరావు కుమారుడు కోవెలమూడి సూర్య ప్రకాష్ అని తెలుస్తోంది. ఈ చిత్రాన్ని శ్రీరామరాజ్యం నిర్మాత సాయిబాబా నిర్మించనున్నారు. ఈ మేరకు బాలకృష్ణతో చర్చలు జరుగుతున్నట్లు సమాచారం. ప్రకాష్ చెప్పిన ఓ కథకు బాలకృష్ణ ఓకే చేసాడని, గ్రాఫిక్స్ తో కూడిన జానపద చిత్రంగా ఈ చిత్రం తెరకెక్కనుందని తెలుస్తోంది. ఇక ఈ సినిమాని బాలక్రిష్ణకు బిగ్ హిట్ ఇచ్చిన భైరవ ద్వీపం సినిమాకు సీక్వెల్ గా తీస్తారనే కొత్త వార్త కూడా వినిపిస్తుంది. బాలక్రిష్ణ వందవ సినిమా భైరవ ద్వీపానికి సీక్వెల్ గా వస్తుందా ? లేక కొత్త స్టోరీతో ఉంటుందా అనేది అధికారిక వార్తలు వచ్చేవరకు వేచి చూడాల్సిందే.