Posted: 11/22/2012 09:45 PM IST

మన రాష్ట్రంలో ఏ మంచి తల పెట్టినా దానికి రాజకీయ రంగు పులమడం మన రాజకీయ నాయకులకు అలవాటే. తాజాగా రాష్ట్ర ప్రభుత్వం ఎంతో ప్రతిష్టాత్మకంగా నిర్వహించ తల పెట్టిన ప్రపంచ తెలుగు మహాసభలకు కూడా రాజకీయ తెగులు పట్టుకుంది. ఇప్పటికే తెలుగు భాష అంతరించి పోతున్న తరుణంలో తెలుగు భాషను, తెలుగు కీర్తిని ప్రపంచానికి చాటడానికి తలపెట్టిన ఈ సభలకు రాజకీయ రంగు అంటించడం ఎంత వరకు సమంజసమో రాజకీయ నాయకులకే తెలియాలి. ప్రభుత్వం చేపట్టే పనులలో లోసుగులు వెతిని, దానికి రాజకీయం చేసి, అధికార పార్టీని దెబ్బతీయడానికి ప్రయత్నించే రాజకీయ పార్టీలు ఎన్నో. ఇప్పుడు తిరుపతిలో నిర్వహించే ఈ సభలను వైయస్సార్ కాంగ్రెస్ పార్టీ రాజకీయం చేస్తుంది. తిరుపతి ఎమ్మెల్యే అయిన భూమన కరుణాకర్ రెడ్డి ఒక తెలుగు వాడై ఉండి, రాజకీయం కోసం తెలుగు మహా సభలను బహిష్కరించండి అని పిలుపు నివ్వడం చూస్తుంటే మన రాజకీయ నాయకులు ఎంత దిగజారారో అర్థం అవుతుంది.

రాజకీయ పార్టీలు అధికార పార్టీ లొసుగులను వెతకడం మంచిదే.. కానీ ప్రతి దానిని రాజకీయం చేయడం కరెక్టు కాదు. ఇప్పటికే రాష్ట్రంలో తెలంగాణ, ఆంధ్ర అంటూ ప్రాంతీయ, భాషా భేధాలు చూపిస్తున్నారు. ఇటు తెలంగాణ వాదులు కూడా తెలుగు సభలు ఆంధ్ర వారికి సంబంధించినవి కాబట్టి వాటిని బహిష్కరించాలని పిలుపునిస్తున్నారు. ప్రాంతాలు వేరయినా, ప్రాస వేరయినా తెలుగు వాళ్లు మాట్లాడేది తెలుగు భాషే. అలాంటి తెలుగు వాళ్ళు ఇలాంటి తెలుగు సభలను అడ్డుకోవాలని చూడటం చూస్తుంటే మనం మన భాషకు ఎంత ప్రాధాన్యత ఇస్తున్నామో అర్థం అవుతుంది. తెలుగు భాష చచ్చిపోతుంది దానిని కాపాడుకొని ముందు తరాలకు అందివాల్సిన మన నాయకులే ఇలాంటి సభలకు అడ్డు తగలడంతో కవులు, పండితులు, భాషోద్యమకారులే కాకుండా తెలుగును అభిమానించే ప్రతి తెలుగు వాడు బాధపడుతున్నాడు.