Posted: 11/16/2012 05:08 PM IST

ఇటీవలి కాలంలో ఓ కేంద్రమంత్రి ఇంటికి మేం రామంటే.. రామంటూ కొందరు తెలంగాణ మంత్రులు ముఖం చాటేస్తున్నారు. ఇన్నాళ్లూ ఢిల్లీ వెళ్లినప్పుడల్లా ఆ పెద్దాయన ఇంటికి వెళ్లి, దర్శనం చేసుకోవడం వీరికి పరిపాటిగా ఉండేది. అయితే, ఇటీవలి కేంద్ర మంత్రివర్గ పునర్వ్యవస్థీకరణలో సదరు మంత్రిగారిని కీలకమైన శాఖ నుంచి ప్రాధాన్యత లేని శాఖకు బదిలీ చేయడం, అంతకుముందే రాష్ట్ర ముఖ్యమంత్రితో విభేదాలు పొడచూపడం వంటి కారణాలతో ఎందుకైనా మంచిదని తెలంగాణ మంత్రులు ఇప్పుడు కొంచెం డిస్టెన్స్ మెయింటేన్ చేస్తున్నారట! గ్యాస్ కేటాయింపుల విషయంలో సీఎంకు ఆ కేంద్ర మంత్రికి మధ్య నడిచిన లేఖాస్త్రాలు వారి మధ్య పచ్చగడ్డి వేస్తే.. భగ్గుమనేలా చేశాయట. అటు గ్యాస్ విషయంలో అంబానీలతో పేచీ పెట్టుకోవడంతో కేంద్రంలో ఆయన శాఖ కూడా మారిపోయింది. ఈ రకంగా అటు కేంద్రం ఇటు సీఎం దృష్టి పడిన నేత కావడంతో ఆయనింటికి వెళితే.. మనం పైవారి దృష్టిలో పడతామో.. ఏమో.. ఉన్న నాలుగు రోజులు పదవిని కాపాడుకోవడమే ఉత్తమం అని సదరు మంత్రులు అనుకుంటున్నట్లున్నారని టి.కాంగ్రెస్ నేతల్లో గుసగుసలు మొదలయ్యాయి. అందుకేనేమో.. ఇటీవల కొందరు తెలంగాణ మంత్రులు ఢిల్లీ వెళ్లినప్పుడు.. ఆ పెద్దాయనను కలిసొద్దామని ఒక మంత్రిగారు ప్రతిపాదిస్తే.. మిగిలిన వారంతా ఏదో పని ఉందంటూ ఆంధ్రాభవన్‌కు వెళ్లిపోయారు. అసలే రాష్ట్రంలో నాయకత్వ మార్పు అంటున్నారు.. ఈ టైమ్‌లో లేనిపోని కిరికిరీలు తెచ్చుకోవడమెందుకు అని ఒక మంత్రిగారు సహచరుడికి సేఫ్ జోన్‌పై క్లాస్ కూడా తీసుకున్నారట.