Posted: 08/31/2012 07:05 PM IST

సమకాలికులు రాహుల్ ద్రవిడ్, వీవీఎస్ లక్ష్మణ్ ఇప్పటికే అంతర్జాతీయ క్రికెట్‌కు వీడ్కోలు పలికినా ప్రస్తుతానికి తనకలాంటి ఆలోచన లేదని సచిన్ టెండూల్కర్ మరోమారు స్పష్టం చేశాడు. ‘బ్యాట్ పట్టేందుకు ఏ రోజు అంతగా ఉత్సాహంగా అనిపించదో అప్పుడు రిటైర్‌మెంట్ విషయమై ఆలోచిస్తా. అయితే ఇప్పటిదాకా ఆ పరిస్థితి రాలేదు. వస్తే మాత్రం తప్పకుండా ఆట నుంచి తప్పుకుంటాను’ అని ‘క్యాస్ట్రల్ టెస్ట్ క్రికెటర్ ఆఫ్ ద ఇయర్’ అవార్డును అందుకున్న అనంతరం సచిన్ స్పష్టం చేశాడు. మరోవైపు వన్డేల్లో డబుల్ సెంచరీ చేసినందుకు ప్రత్యేక అవార్డు అందుకున్న ఓపెనర్ సెహ్వాగ్ వంద టెస్టులు ఆడడమే లక్ష్యమని ప్రకటించాడు. బౌలర్ వేసిన ప్రతీ బంతిని బాదాలనే లక్ష్యంతో ఆడినట్టు తన ద్వి శతకం గురించి వీరూ చెప్పాడు. గత రెండు టి20 ప్రపంచకప్‌లు నిరాశపరిచాయని, ఈసారి మరింత మెరుగ్గా ఆడేందుకు ప్రకత్నిస్తామని ‘పెర్ఫార్మెన్స్ అండర్ ప్రెషర్’ అవార్డును గెలుచుకున్న గౌతమ్ గంభీర్ చెప్పాడు. ‘కప్ గెలుస్తామని కచ్చితంగా చెప్పలేను. అది మా చేతుల్లో లేదు. అయితే అద్భుత ప్రదర్శనతో ఆకట్టుకుంటాం’ అని అన్నాడు.