Posted: 08/09/2012 06:30 PM IST

తెలంగాణ రాష్ట్రసమితి అధ్యక్షుడు కేసీఆర్ కి, తెలంగాణ సంయుక్త కార్యచరణ కమిటీ (టీజేఏసీ) ఛైర్మె కోదండరామ్ కి మధ్య గత కొన్ని రోజుల నుండి కోల్డ్ వార్ నడుస్తున్న విషయం తెలిసిందే. ఈ మధ్య కాలంలో వీరిద్దరి కలిసి పాల్గొన్న సమావేశాలు కానీ, కలిసి ఇచ్చిన స్టేట్ మెంట్లు గానీ లేవు. ఎప్పుడైనా అనుకోకుండా కలిస్తే కూడా చూసి చూడనట్లుగా వ్యవహరించి మీడియా కంట్లో పడకుండా ఆ కార్యక్రమాన్ని ముగిస్తున్నారు.

మరి వీరిద్దరికి మధ్య పచ్చిగడ్డి వేస్తే భగ్గుమనే స్థాయికి విభేదాలు రావడానికి అనేక కారణాలు ఉన్నాయని చెప్పవచ్చు.టీఆర్ఎస్ పార్టీ అధ్యక్షుడు కేసీఆర్ తెలంగాణ ఉద్యమం పేరు చెప్పి కోట్లు దండుకోవడమే కాకుండా, తన రాజకీయ భవిష్యత్తు అందకారం కాకుండా ఉండటానికే ఈ ఉద్యమాన్ని నడిపిస్తున్నాడనేది జగమెరిగిన సత్యం. ఈ విషయాన్ని ప్రొఫెసర్ కోదండరామ్ కి చాలా కాలం తరువాత తెలిసివచ్చింది. దీంతో కోదండరామ్ కేసీఆర్ ఏ స్టేట్ మెంట్ ఇచ్చినా దానికి వెంటనే కౌంటర్ ఇస్తున్నాడు. ఈయన కౌంటర్లను అర్థం చేసుకున్న టీఆర్ఎస్ వర్గం కేసీఆర్ కి ఓ సూచన చేసినట్లు సమాచారం.

టీజేఏసీ ఛైర్మెన్ గా కోదండరామ్ ని ఇలాగే ఉంచితే మన రాజకీయ భవిష్యత్తు అందకారం అవుతుందని, భవిష్యత్తులో మనకే ఎదురు తిరిగే పరిస్థితి వస్తుందని చెప్పడంతో కేసీఆర్ కూడా ఆలోచనలో పడి, కోదండరామ్ ని ఎలాగైనా బయటికి పంపి, తనకు అనుకూలంగా ఉండే వారిని టీజేఏసీ ఛైర్మెన్ గా నియమించాలని అనుకుంటున్నాడట. అంతేకాకుండా ఈ పదవికి సరైన వాడు ఇటీవలే ఉద్యోగుల సంఘం అధ్యక్షుడు స్వామిగౌడ్ అయితే మనం చెప్పినట్లు వింటాడని భావించి ఆయన్ని టీజేఏసీ ఛైర్మన్ ప్రొఫెసర్ కోదండరామ్‌ స్థానంలో నియమించాలని బావిస్తున్నాడట.

స్వామిగౌడ్‌ను ముందుంచి.. జేఏసీ గొడుగు కింద ఉన్న పలు సంఘాలను తెరాస అనుబంధ సంఘాలుగా ముందుకు తెచ్చేందుకు ఆయన వ్యూహరచన చేసినట్టు సమాచారం. బొగ్గుగని కార్మికులు, ఆర్టీసీ కార్మికుల విషయంలో ఆ పని ఇప్పటికే జరిగిపోయింది కూడా.  కేసీఆర్ వ్యూహం అమలు అయితే త్వరలో స్వామి గౌడ్ కి టీజేఏ పగ్గాలు వస్తాయని టీఆర్ఎస్ వర్గాల భోగట్టా.