Posted: 07/23/2012 07:00 PM IST

తెలుగుదేశం పార్టీ అధినేత  చంద్రబాబు నాయడుకు షాక్ మీద షాక్ తగులుతుంది.  ఇటీవల  చంద్రబాబు  నాలుగురు ఎమ్మెల్యేలను సస్పెన్షన్  చేసిన విషయం తెలిసిందే. అయితే  ఆ నాలుగురిలో  ఒక ఎమ్మెల్యేకు  ఒక వింత డౌట్ వచ్చిందట.  వెంటనే  బాబుకు ఆయన ఒక లేఖాస్త్రం  వ్రాసినట్లు తెలుస్తోంది. నూజివీడు ఎమ్మెల్యే చిన్నం రామకోటయ్యకు భలే డౌట్ వచ్చిందట. గతంలో ఈయన పట్ఠణాభివృద్ది సంస్ఠలో పనిచేయటం వలన కొన్ని లక్షణాలు  బాగా అలవాటు పడినట్లు తెలుస్తోంది. అందువల్ల అన్ని లిఖితపూర్వకంగా ఉండాలని కోరుకుంటున్నట్లుగా పార్టీ నాయకులు అంటున్నారు. అందువల్లనే ఆయనకు ఈ సందేహం వచ్చిందేమో. అయినా పార్టీ కూడా ఏ ప్రకటనను అయినా సంబంధిత వ్యక్తికి పంపడం కూడా అవసరమే.

ఇంతకీ విషయం ఏమిటంటే పార్టీ నుంచి తాము నిజంగానే సస్పెండ్ అయ్యామా? లేక ఉత్తుత్తి వార్తలేనా? అని ప్రశ్నిస్తూ టిడిపి అధ్యక్షుడు చంద్రబాబుకు ఎమ్మెల్యే చిన్నం రామకోటయ్య లేఖ రాసినట్లు తెలుస్తోంది.  తమని సస్పెండ్ చేసినట్లు వార్తలొచ్చి 24 గంటలయినా ఇంతవరకు తమకు అధికారికంగా ఎలాంటి లేఖ అందలేదని ఆయన అంటున్నారు. ఒకవేళ సస్పెండ్ చేసినట్లయితే, దానికి సంబంధించి లేఖ తమకు ఇవ్వాలని ఆయన డిమాండ్ చేసినట్లు తెలుస్తోంది. లేదా సస్పెన్షన్ వార్తలు అసత్యమని మీడియాలో ప్రకటించాలని ఆ లేఖలో కోరటం జరిగిందని టీడీపీ నాయకులు అంటున్నారు. ఒకపక్క కాంగ్రెస్ వారితో కలిసి చెట్టపట్టాలు వేసుకుని తిరుగుతూ రామకోటయ్య ఈ ఉత్తరం రాయడంలోని ఆంతర్యం ఏమిటోనని పార్టీ నాయకులు గుసగుసలాడుకుంటున్నారు.