Posted: 07/14/2012 03:56 PM IST

ప్రముఖ సినీ నటుడు బాలకృష్ణను తెలుగుదేశం పార్టీలో వర్కింగ్ అద్యక్షుడుగా నియమించాలని కొందరు డిమాండ్ చేస్తున్నారని కదనాలు వస్తున్నాయి.బాలకృష్ణ కూడా తాను పార్టీలో క్రియాశీలకం అవడానికిగాను ఏదో ఒక పదవి ఉండాలని బావిస్తున్నారని అంటున్నారు. ఈ విషయమై పార్టీ అదినేత చంద్రబాబు నాయుడుపై ఒత్తిడి చేస్తున్నారని చెబుతున్నారు.అయితే బాలకృష్ణ నాయకత్వ పటిమ కార్యకర్తలను ఎంతవరకు ఆకట్టుకుంటుందన్నదానిపై భిన్న వాదనలు ఉన్నాయి. ఇంతకాలం బాలకృష్ణపై ఎన్ని విమర్శలు ఉన్నా, ఆయన క్రియాశీలక రాజకీయాలలో రాలేదు కనుక వాటి జోలికి ప్రత్యర్దులు వెళ్లడం లేదు. ఒక్కసారి ఏదైనా పదవి తీసుకుని రాజకీయాలలోకి వచ్చారంటే , ఆ వెంటనే బాలకృష్ణ ఇంటిలో జరిగిన కాల్పుల ఘటనపై విమర్శలు, మళ్లీ వివాదాలు, అవకాశం వస్తే కోర్టుకు వెళ్లడం వంటివి కూడా జరగవచ్చు.ఇది ఒకరకంగా ఆయనకు ఇబ్బందే అవుతుంది. అంతదాకా ఎందుకు పార్టీ మారినందుకే జగన్ పై ఎన్ని కేసులు పెట్టారో అంతా చూస్తున్నారు. ఈ అనుభవం కళ్లెదుట ఉండి కూడా బాలకృష్ణ వస్తారా?వచ్చినా సఫలం అవుతారా?

తాజా పరిణామాలు చూస్తే. వచ్చే ఎన్నికల సమయానికి సంపూర్ణమైన రాజకీయ నాయకుడిగా మారడానికి ఆయన స్కెచ్ వేశారు. కష్ట కాలంలో ఉన్న పార్టీకి జవసత్వాలు తీసుకొచ్చేందుకు ఆయన తనవంతు తోడ్పాటునందించేందుకు సిద్ధమవుతున్నారు. పార్టీని నడిపించేందుకు చంద్రబాబు చేస్తున్న ప్రయత్నాలు సరిపోవడం లేదని.. ఆయనకు తోడుగా తానూ తోడ్పాటునందిస్తానని ఇటీవల బాబుతో సమావేశమైన బాలయ్య చెప్పినట్లు సమాచారం. ఇకపై సినిమా షూటింగులకు నెలలో 15 రోజులే కేటాయించి, మిగత 15 రోజులు పార్టీ కోసం కేటాయిస్తానని బాలయ్య చెప్పినట్లు సమాచారం. పార్టీలో ఓ ముఖ్య పదవిని బాలయ్య కోరుకుంటున్నట్లు ఆయన సన్నిహితులు చెబుతున్నారు. మరి బాబు గారు బావకు ఏ పదవి కట్టబెడతారో చూడాలి.