Posted: 07/13/2012 06:31 PM IST

తన సొంత జిల్లాకు చెందిన రాజకీయ సహచరుడు జైల్లో ఎలా ఉన్నాడో తెలుసుకోవాలనుకొన్నాడో ఏమో కానీ గుంటూరు ఎంపీ రాయపాటి సాంబశివరావు ప్రత్యేకంగా జైలుకు వెళ్లి మోపిదేవి వెంకటరమణను పరామర్శించాడు. చంచల్ గూడ జైల్లో ప్రత్యేక ములాఖత్ ద్వారా రాయపాటి మోపిదేవి వెంకటరమణను కలిశాడు. రాయపాటి బయటకు వస్తున్న తరుణంలో విలేకరులు మీ సమావేశంలో ఆంతర్యం ఏమైనా ఉందా అంటే అలాంటిదేమీ లేదని తెల్చేశాడు ఈ ఎంపీ. దాదాపు 20 నిమిషాల పాటు రాయపాటి, మోపిదేవిలు మాట్లాడు కొన్నారని సమాచారం.

జైల్లో రాయపాటి కేవలం మోపిదేవినే కాక పారిశ్రామిక వేత్త, వాన్ పిక్ వ్యవహారంలోనే జైల్లో ఉన్న నిమ్మగడ్డ ప్రసాద్ ను కూడా పరామర్శించాడని తెలుస్తోంది! మరి ఈ ఎంపీ ప్రస్తుతం జగన్ పై కూడా అంత వ్యతిరేకతతో లేడని బహిరంగంగానే తేలిపోయింది. మరి ఇలాంటి తరుణంలో జైలుకు వెళ్లి జగన్ ను కలిసి ఉండడా? అనేది సమాధానం లేని ప్రశ్నగా మిగిలింది. కుల సమీకరణ గురించి అద్భుతంగా వివరించగల ఈ ఎంపీ రాజకీయ సమీకరణాలను లెక్కేసుకొని జగన్ ను కలిసే ఉంటాడు అని వినిపిస్తోంది. బహుశా ఇది బయటకు పొక్కితే అంత మంచిది కాదు అనే ఉద్దేశంతోనే రాయపాటి ప్రస్తుతానికి  సైలెంట్ గా ఉండిపోయుంటాడని, అతడు చాలా చాకచక్యంగా వ్యవహరించే అనుభవం ఉన్నవాడని రాయపాటి సహచరులే అంటున్నారు.