Posted: 07/13/2012 03:50 PM IST

ఆడపిల్లలకు బూతు మెసేజ్ లు , వేధింపుల కేసుల్లో  ఇరుకున్న ఐపిఎస్ పోలీసు అధికారి సీతారామాంజనేయులు కర్నూలు, గుంటూరు జిల్లాలలో ఎస్.పిగా పనిచేసినప్పుడు జరిగిన ఎన్ కౌంటర్లన్నీ బూటకమేనని జాతీయ మానవ హక్కుల సంఘం స్పష్టం చేసింది. బాధిత కుటుంబాలకు ఐదు లక్షల రూపాయల చొప్పున చెల్లించాలని కూడా ప్రభుత్వాన్ని ఎన్.హెచ్.ఆర్.సి ఆదేశించింది.సీతారామాంజనేయులు కర్నూలులో ఎస్.పిగా ఉన్నప్పుడు కొందరు దోపిడీ దొంగలను ఎన్ కౌంటర్ చేశారన్న ఆరోపణలు ఉన్నాయి. మొత్తం పందొమ్మిది మంది ఆయన హయాంలో మరణించగా, వాటిలో పదహారు కేసులు బూటకమేనని కమిషన్ తేల్చింది.

అయితే ఇవి బూటకమని తేల్చిన మానవ హక్కుల కమిషన్ పోలీసు అధికారులపై కేసులు పెట్టకుండా కేవలం పరిహారం చెల్లించమని ఆదేశించి సరిపెట్టుకోవడమేమిటని న్యాయవాది చంద్రశేఖర్ అన్నారు. ప్రస్తుతం ఐజి హోదాలో ఈయన ఉన్నారని ఆయన చెప్పారు. ప్రజలను రక్షించాల్సిన పోలీసు అదికారులు కొందరిని చట్ట విరుద్దంగాచంపితే , వారిపై హత్యా నేరం కింద కేసు పెట్టాలని సిఫారస్ చేయలేదని, కేవలం పరిహారం మాత్రమే చెల్లించాలని కోరిందన్నారు. ఏది ఏమైనా కొందరు పోలీసు ఉన్నతాదికారులు ఇష్టారాజ్యంగా వ్యవహరిస్తూ వివాదాస్పదులు అవడం దురదృష్టకరం. చేతిలో తుపాకి ఉందని ఎన్ కౌంటర్ చేయడం ఎంత దారుణమో చెప్పనవసరం లేదు.మరి ఇప్పుడు ప్రభుత్వం ఈయనపై ఎలాంటి చర్య తీసుకుంటుందో చూడాలి.