Posted: 06/29/2012 05:29 PM IST

సినీ రంగం, రాజకీయ రంగంలోను ..తండ్రి తరువాత కొడుకులు వస్తున్న విషయం మనం చూస్తున్నాం. కానీ  హైకోర్టు జడ్జీల విషయంలో  కూడా ఇలా జరుగుతుందట. జడ్జీల  కొడుకులే మరల జడ్జీలు గా వస్తున్నారు. రాష్ట్ర హైకోర్టు అదనపు న్యాయమూర్తులుగా చాగరి ప్రవీణ్‌కుమార్, ఎం.సత్యరత్న శ్రీరామచంద్రరావులతో తాత్కాలిక ప్రధాన న్యాయమూర్తి జస్టిస్ పినాకినీ చంద్రఘోష్  ప్రమాణం చేయించనున్నారు. వీరి నియామకానికి సంబంధించిన ఫైలుపై రాష్ట్రపతి సంతకం చేసి అధికారిక ఉత్తర్వులు జారీ చేశారు.

వీరిద్దరి నియామకంతో హైకోర్టు న్యాయమూర్తుల సంఖ్య 32కు చేరనుంది. హైకోర్టు న్యాయమూర్తుల మొత్తం సంఖ్య 49. అంటే ఇంకా 17 ఖాళీలున్నాయి. వాటి భర్తీకి కొందరు న్యాయవాదుల పేర్లను కూడా హైకోర్టు సిఫార్సు చేసింది. వీరిద్దరూ చిన్న వయసులో న్యాయమూర్తులు అవుతున్నందున ఆ పదవిలో ఎక్కువ కాలం పాటు కొనసాగడమే గాక భవిష్యత్తులో సుప్రీంకోర్టు న్యాయమూర్తులు కూడా అవుతారు. దాంతో వీరి నియామకాన్ని అడ్డుకునేందుకు టీడీపీకి హైకోర్టులో అన్నీ తానై వ్యవహరిస్తున్న ఓ న్యాయమూర్తి సర్వశక్తులూ ఒడ్డారు. ఢిల్లీ స్థాయిలో తన పలుకుబడినంతా ఉపయోగించారు. వారికి వ్యతి రేకంగా పిటిషన్లు కూడా వేయించారు. అయినా ఆయన ప్రయత్నాలు ఫలించలేదు.

సి.ప్రవీణ్‌కుమార్ 1961 ఫిబ్రవరి 26న జన్మించారు. నిజాం కాలేజీ నుంచి బీఎస్సీ, ఉస్మానియా నుంచి ఎల్‌ఎల్‌బీ చేశారు. 1986లో న్యాయవాదిగా నమోదు చేసుకున్నారు. జస్టిస్ ఒ. చిన్నపరెడ్డి సుప్రీంకోర్టు న్యాయమూర్తిగా ఉండగా ఆయన వద్ద కొంతకాలం లీగల్ అసిస్టెంట్‌గా పనిచేశారు. తరవాత తండ్రి సి.పద్మనాభరెడ్డి వద్దే న్యాయవాద వృత్తిలో మెళకువలు నేర్చుకున్నారు. తండ్రిలాగే క్రిమినల్ కేసుల్లో నైపుణ్యం సాధించారు.

 శ్రీరామచంద్రరావు సుప్రీంకోర్టు మాజీ న్యాయమూర్తి, లా కమిషన్ మాజీ చైర్మన్ జస్టిస్ ఎం.జగన్నాథరావు కుమారుడు. 1966 ఆగస్టు 7న హైదరాబాద్‌లో జన్మించారు. 1989లో ఓయూ నుంచి ఎల్‌ఎల్‌బీలో బంగారు పతకం సాధించారు. అదే ఏడాది న్యాయవాదిగా నమోదు చేసుకున్నారు. 1990-91లో కేంబ్రిడ్జిలో ఎల్‌ఎల్‌ఎం పూర్తి చేశారు. కేంబ్రిడ్జిలో ఉండగా కామన్వెల్త్, బ్యాంక్ క్రెడిట్ అండ్ కామర్స్ ఇంటర్నేషనల్ స్కాలర్‌షిప్‌లు సాధించారు. సివిల్, ఆర్బిట్రేషన్, కంపెనీ, రాజ్యాంగ, కార్మిక చట్టాల్లో నిపుణుడు. హైకోర్టులో ప్రభుత్వ ప్రత్యేక న్యాయవాదిగానూ పని చేశారు.