Posted: 06/27/2012 06:53 PM IST

పాలబుగ్గల సుందరి తమన్నా ఏడేళ్ల తర్వాత మళ్లీ ఓ హిందీ సినిమా చేయబోతున్నారని సమాచారం. 2005లో ‘చాంద్ సా రోషన్ చెహ్రా’ చిత్రం ద్వారా ఆమె కథానాయికగా రంగప్రవేశం చేశారు. ఆ చిత్రం తర్వాత బాలీవుడ్‌లో కెరీర్ ఆశాజనకంగా లేకపోవడం, తెలుగులో ‘శ్రీ’ చిత్రానికి అవకాశం రావడంతో తమన్నా ఇక్కడకు రావడం జరిగింది. అనంతరం ‘హ్యాపీడేస్’ తర్వాత ఈ బ్యూటీ కెరీర్ ఎంత మంచి మలుపు తీసుకుందో తెలిసిందే. ప్రస్తుతం తెలుగుతో పాటు తమిళ భాషలో కూడా మంచి క్రేజ్ తెచ్చుకున్న తమన్నాపై ఇప్పుడు బాలీవుడ్‌వారి దృష్టి కూడా పడింది. బాలీవుడ్‌కి చెందిన రెండు అగ్రనిర్మాణ సంస్థలు త్వరలో తీయబోయే చిత్రాల్లో తమన్నాని నాయికగా ఎన్నుకోవడానికి ముందుకొచ్చాయని సమాచారం.

వీటిలో జితేంద్ర, శ్రీదేవి నటించిన ‘హిమ్మత్‌వాలా’ రీమేక్ ఒకటని వినికిడి. ఇందులో అజయ్‌దేవగన్ హీరోగా నటించబోతున్నారట. సాజిద్‌ఖాన్ దర్శకత్వంలో ఈ చిత్రం రూపొందనుందట. ప్రస్తుతం ఈ చిత్రదర్శక,నిర్మాతలు తమన్నాతో సంప్రదింపులు జరుపుతున్నారనే వార్త ప్రచారంలో ఉంది. అన్నీ కుదిరితే త్వరలో ఆమె ఈ సినిమాకి సైన్ చేసే అవకాశం ఉందని తెలుస్తోంది. ‘హిమ్మత్‌వాలా’ చిత్రం ఎంతటి ఘనవిజయాన్ని సొంతం చేసుకుందో ప్రత్యేకంగా చెప్పక్కర్లేదు. ఆ చిత్రం రీమేక్ ద్వారా బాలీవుడ్‌లో తమన్నా సెకండ్ ఇన్నింగ్స్ ఆరంభమైతే బాగుంటుందని పలువురు భావిస్తున్నారు.

 తమన్నా ప్రస్తుతం బొద్దుగా మారే పనిలో ఉన్నారట. బాలీవుడ్‌లో శ్రీదేవికి స్టార్‌డమ్ తెచ్చిపెట్టిన ‘హిమ్మత్‌వాలా’ బాలీవుడ్ రీమేక్‌లో తమన్నా నటించడానికి అంగీకరించిన విషయం తెలిసిందే. ఈ సినిమా కోసమే తమన్నా బొద్దుగా మారుతున్నారని కోలీవుడ్ మీడియాలో కథనాలు వెలువడుతున్నాయి. ‘హిమ్మత్‌వాలా’ టైమ్‌లో శ్రీదేవి కూడా బొద్దుగానే ఉన్నారు. ముద్దుగా బొద్దుగా ఉన్న శ్రీదేవిని చూసి ఆ రోజుల్లో బాలీవుడ్ జనం ఆకర్షితులయ్యారు. అలాగే తను కూడా బొద్దుగా మారి శ్రీదేవిలా బాలీవుడ్ ప్రేక్షకులను మాయ చేయాలనుకుంటున్నారట తమన్నా.

ఇలాంటి పుకార్లు ఎవరు సృష్టిస్తారో కానీ.. వాళ్లను నిజంగా అభినందించాలి. వాళ్ల చానల్స్ రేటింగుల కోసం వాళ్లు పడే పాట్లవి. ఎలాగోలా కష్టపడి రేటింగులు పెంచేసుకుంటారు. కాబట్టి అలాంటి రూమర్ల గురించి పెద్దగా పట్టించుకోవాల్సిన పనిలేదు. అసలు ‘హిమ్మత్‌వాలా’ సినిమా కథకు, శ్రీదేవి బొద్దుగా ఉండడానికి ఏమైనా సంబంధం ఉందా? ఆమె శారీర తీరు అలా ఉంటుంది.

అదే శ్రీదేవికి అందం కూడా. ఆ సినిమాలో శ్రీదేవి బొద్దుగా ఉన్నారని నేను కూడా బొద్దుగా తయారైతే... చూడ్డానికి అసహ్యంగా ఉంటుంది. నిజంగా నచ్చిన పాత్ర డిమాండ్ చేస్తే లావవ్వడానికి నాకేం అభ్యతరం లేదు. ‘హిమ్మత్‌వాలా’ విషయంలో నాపై వినిపిస్తున్న కథనాలు మాత్రం పూర్తిగా వాస్తవదూరం  అని చెప్పారు తమన్నా.