Posted: 06/16/2012 04:37 PM IST

దివంగత ముఖ్యమంత్రి వైఎస్ఆర్ వెనుక ఎప్పుడూ ఓ తెల్ల జుట్టాయన కనిపించేవారు.  ఆయన పేరు  సూర్యనారాయణ రెడ్డి అలియాస్ సూరీడు. వైఎస్ మరణానంతరం కనిపించకుండా పోయిన ఆ సూరీడే  మరోసారి వైఎస్ కుటుంబానికి దగ్గర కానున్నారన్న  ఊహాగానాలు సాగుతున్నాయి . మూడు దశాబ్దాలకు పైగా ముఖ్య అనుచరుడిగా, తలలో నాలుకలా మెలిగిన  సూరీడు  వైఎస్ కుటుంబానికి  మరోసారి దగ్గర కానున్నారన్న వార్తల్లో  నిజమెంతోగాని .. ఆయన్ని  జగన్  దూరంగా పెట్టడానికి కొన్ని  బలమైన కారణాలే ఉన్నాయంటూ ఆమద్య వార్తలు గుప్పుమన్నాయి.  జగన్ ఆస్తులు కేసుతో పాటు , ఎమ్మార్  కేసు విచారణ సందర్భంగా  సిబిఐ  సూరీడుని విచారించింది. 

ఆ సందర్భంగా  వైఎస్ కుటుంబ విషయాలన్ని  తెలిసిన సూరీడు  సిబిఐకి కీలక సమాచారమే ఇచ్చినట్టు  జగన్ వర్గం అనుమానిస్తోంది.  ఆ కారణంతోనే సూరీడుని  దూరం  పెట్టిందంటున్నారు.  వైఎస్ సిఎం అయ్యాక ఆయనకు ఆత్మగా  వ్యవహరించిన కెవిపి రామచంద్రరావుతోపాటు కొడుకుగా  జగన్ ప్రభుత్వం  నిర్ణయాల్లో ఎలా జోక్యం  చేసుకునేవారన్నదానిపైనే  సిబిఐ  సూరీడి నుంచి సమాచారం రాబట్టినట్టు తెలుస్తోంది.  అయితే  ఆ వార్తల్లో  నిజంలేదని  సుదీర్ఘకాలం పాటు  నమ్మిన బంటుగా  వ్యవహరించిన  తాను వైఎస్  కుటుంబానికి  ఎలాంటి  ద్రోహమూ చేయలేదంటూ  తిరిగి  జగన్ కు దగ్గరయ్యేందుకు  యత్నిస్తున్నట్టు  తెలుస్తోంది.  ముఖ్యంగా ఉప ఎన్నికల్లో  జగన్ పార్టీ అనూహ్య మెజార్టీని  సాధించడంతో  మరోసారి  ఆ కుటుంబానికి  సన్నిహితమైన  జగన్  పక్కన చేరేందుకు  అవకాశం కోసం ఎదురు చూస్తున్నట్టు సమాచారం.  అంటే త్వరలో  జగన్ వెనక సూరీడు  ఉదయిస్తాడని  వైఎస్ఆర్ పార్టీ కార్యకర్తలు అనుకుంటున్నారు.