Posted: 05/02/2012 08:59 PM IST

2013లో క్రికెట్ నుండి వైదోలగనున్నట్లు వచ్చిన వార్తలపై భారత క్రికెట్ జట్టు కెప్టెన్ మహేంద్ర సింగ్ ధోని కొట్టి పారేశాడు. రిటైర్ మెంట్ అనేది ఫిట్‌నెస్ మీద ఆధారపడి ఉంటుందని అన్నాడు. 2015 ప్రపంచకప్ ఆడదలుచుకుంటే టెస్టు ఫార్మాట్ నుంచి తప్పుకుంటానని గత జనవరిలో ఆసీస్ పర్యటన సందర్భంగా ధోని చెప్పిన విషయం తెలిసిందే. వచ్చే ప్రపంచకప్‌లో ఆడే విషయంపై 2013 చివర్లో నా ఫిట్‌నెస్‌ను గమనిస్తాను. నా ఫిట్‌నెస్ అంత సమర్దవంతంగా అనిపించకపోతే యువ క్రికెటర్లకు అవకాశం కోసం వైదొలుగుతను.. ఒకవేళ 2014 వరకు మాత్రమే రెండు ఫార్మాట్లలో ఆడగలననుకుంటే ముందే వన్డేల నుంచి తప్పుకుంటా. ఎందుకంటే 2015 ప్రపంచకప్‌లో ఆడే అవకాశం నాకెలాగూ ఉండదు కాబట్టి.

ఫిట్ నెస్ సరిగ్గా లేని సమయంలో వన్డే కెరీర్‌ను కొనసాగించడం వేస్టు. ప్రస్తుతం టీమిండయా జట్టుకు మంచి అనుభవజ్ఞుడైన కీపర్ అవసరం. నిజానికి కీపర్ సగం కెప్టెన్‌లాంటి వాడు. ఫీల్డింగ్ సెట్ చేయడంతో పాటు బ్యాట్స్‌మెన్ బలహీనత గురించి కెప్టెన్‌కు వివరించవచ్చు. అయితే నేను ఇప్పుడే రిటైర్ కావడం లేదు. దానికి ఇంకా ఏడాదిన్నర సమయముంది. ఆలోపు పెద్ద గాయం కారణంగా అసలు క్రికెట్ ఆడలేని పరిస్థితే ఎదురుకావచ్చు. ప్రస్తుతానికి అంతా సక్రమంగానే ఉందని ధోని తెలిపాడు.