Posted: 03/29/2012 09:42 PM IST

            ప్రతిభ ఉంటే ఎదగటానికి ఆకాశమే హద్దని నిరూపించాడో స్టూడెంట్. ఇంకా ఇంజనీరింగ్ చదువు పూర్తి అవకుండానే భారీ జీతంతో ఉద్యోగం సంపాదించి అందరినీ ఆశ్చర్యంలో ముంచెత్తాడు. అంతేకాదు విద్యార్థిలోకానికి ఆదర్శవంతమయ్యాడు.
            వివరాల్లోకి వెళితే,  అలహాబాద్ లో చదువుకునే,  ఓ కాన్పూర్ విద్యార్థికి 1.34 కోట్ల రూపాయల వార్షిక వేతనాన్ని సోషల్ నెట్‌వర్కింగ్ సంస్థ ఫేస్‌బుక్ నిర్ణయించింది. ఇది దేశంలోనే ఇప్పటి వరకు ఆఫర్ చేసిన అత్యధిక జీతంలో ఒకటిగా పరిగణిస్తున్నారు. ఇంతటి గొప్ప జీతాన్ని పొందిన విద్యార్థి పేరును భద్రతా కారణాల దృష్ట్యా గోప్యంగా ఉంచుతున్నామని మోతిలాల్ నెహ్రూ నేషనల్ ఇనిస్టిట్యూట్ ఆఫ్ టెక్నాలజీ డెరైక్టర్ పి. చక్రవర్తి వెల్లడించారు.
           కాగా, మార్చి 27 తేదిన ఫేస్‌బుక్ పంపిన జాబ్ ఆఫర్ లెటర్‌ను విద్యార్థి అందుకున్నాడు. ఆఫర్ లెటర్‌లో 262,500 డాలర్లుగా పేర్కోన్నట్టు చక్రవర్తి తెలిపారు. తొలుత మెయిల్ ద్వారా ఉద్యోగ ఇంటర్వ్యూ ప్రారంభమై తొమ్మిది రౌండ్ల టెలిఫోనిక్ ఇంటర్వ్యూలుగా కొనసాగిందన్నారు.
          ఇంజినీరింగ్ విద్య పూర్తై తర్వాత కాలిఫోర్నియాలోని మెన్లో పార్క్‌కు వెళ్లనున్నాడని తెలిపారు. ప్రస్తుత విద్యాసంవత్సరంలో సుమారు 30 మందికి పైగా విద్యార్థులు 10 లక్షలకు పైగా, ఆకర్షణీయమైన ప్యాకేజితో మైక్రోసాఫ్ట్, అమెజాన్, అడోబ్ లాంటి కంపెనీలలో ఉద్యోగాలు సంపాదించారని చక్రవర్తి ఉబ్బితబ్బిబ్బవుతున్నారు.

...avnk