Posted: 02/18/2012 04:28 PM IST

బాబు పై విజయమ్మ వేసిన కేసు హైకోర్టు కొట్టివేయటంతో.. వైఎస్ ఆర్ కాంగ్రెస్ పార్టీ సభ్యులకు కొత్త భయం పట్టుకుంది. చంద్రబాబు మాత్రం నేను మచ్చలేని చంద్రుడిని అని చంకలు కొట్టుకున్నాడు. అయితే ఇదే అదునుగా భావించిన సీబీఐ తన యుద్దాన్ని వేగం పెంచింది. సీబీఐ సరికొత్త ఆలోచనలతో జగన్ పై బాణం ఎక్కుపెట్టింది. సీబీఐ అధికారులు పూర్తిగా జగన్ పై నిఘ పెట్టి.. తండ్రి, కొడుకుల యొక్క విషయాలను క్షణ్ణంగా పరిశీలిస్తున్నారు.

జగన్ అక్రమాస్తుల కేసులో విచారణ జరుపుతున్న సీబీఐ అధికారులు దివంగత ముఖ్యమంత్రి వైఎస్ రాజశేఖర్‌రెడ్డి, ఆయన కుమారుడు జగన్మోహన్‌రెడ్డికి సంబంధించిన సెల్‌ఫోన్ నెంబర్ల కాల్‌లిస్టులను విశ్లేషించే పనిలో ఉన్నట్లు తెలుస్తోంది. 2004 నుంచి 2009 వరకు వీరిద్దరూ వాడిన మూడు సెల్‌ఫోన్ నెంబర్లకు సంబంధించిన కాల్‌లిస్టును ఒక సర్వీసు ప్రొవైడర్ నుంచి సీబీఐ కోరినట్లు సమాచారం.

అయితే.. 2004 నుంచి వివరాలు ఇవ్వడంపై సదరు సర్వీస్ ప్రొవైడర్ అధికారులు మల్లగుల్లాలు పడుతున్నట్లు.. ఈ విషయంలో తమకున్న సాంకేతిక ఇబ్బందుల గురించి సీబీఐ ముందు వారు మొరపెట్టుకున్నట్లు సమాచారం. రాష్ట్ర ప్రభుత్వం నుంచి 'మేళ్లు' పొంది ఆపై జగన్ కంపెనీల్లో పెట్టుబడులు పెట్టిన వారిని గుర్తించే పనిలో మునిగిన సీబీఐ అందుకు సంబంధించి కీలక సాక్ష్యాధారాలను సేకరించే ప్రయత్నాల్లో భాగంగానే ఈ వివరాలు కోరినట్లు తెలుస్తోంది.

జగన్ ఎవరెవరితో సంభాషణలు జరిపారు, వైఎస్ ఏయే కంపెనీల అధినేతలతో మాట్లాడారనే విషయాలను నిర్ధారించుకోవడం ద్వారా.. కంపెనీల బాధ్యులను సీబీఐ ప్రశ్నించే అవకాశాలు కన్పిస్తున్నాయి. జగన్ కంపెనీల్లో రూ.కోట్లు పెట్టుబడిగా పెట్టిన పలువురు వ్యక్తులు, సంస్థలకు చెందిన వారు ఏ రోజు ఎన్నిసార్లు నేరుగా వైఎస్, జగన్‌లతో మాట్లాడారనే దానిపై స్పష్టత వస్తే తదుపరి దర్యాప్తు వేగవంతమయ్యే అవకాశాలు కన్పిస్తున్నాయి. జగన్ కేసులో తన ఎఫ్ఐఆర్‌లో నిందితులుగా పేర్కొన్న వారందరి ఫోన్ నెంబర్లను జగన్, వైఎస్ కాల్‌లిస్టులతో పోల్చి చూసే ప్రయత్నాల్లో సీబీఐ ఉన్నట్లు తెలుస్తోంది.