Posted: 02/17/2012 04:33 PM IST

ఇప్పడు తమిళ నాట ఒక విషయం హాట్ టాపిక్ గా మారింది. ఇద్దరు అగ్ర హీరోలు ఒక తెర కనిపిస్తారని అంటున్నారు. ఆ ఇద్దరు తమ కెరీర్ తొలినాళ్లలో కలిసి నటించారు. 25 సంవత్సరాల తరువాత మరళ ఇప్పడు నటిస్తున్నారనే వార్తలు వస్తున్నాయి. 

రజనీకాంత్, కమల్‌హాసన్ మళ్లీ కలిసి నటిస్తారా? అనే ప్రశ్న పలువురి మనసుల్లో ఉన్న నేపథ్యంలో, ఈ కాంబినేషన్‌ని మళ్లీ చూసే సమయం ఆసన్నమైందని ఓ ముంబయ్ పత్రిక వెల్లడించింది. స్వయంగా కమల్‌హాసన్ సదరు పత్రికకు ఈ విషయం చెప్పారట. కమల్ డ్రీమ్ ప్రాజెక్ట్ అయిన 1997 లో ‘మరుదనాయగమ్’లోనే ఈ విశేషం జరగనుంది. దాదాపు పదేళ్ల క్రితం స్వీయదర్శకత్వంలో కమల్ ఈ చిత్రాన్ని ఆరంభించిన విషయం తెలిసిందే. ఈ భారీ బడ్జెట్ చిత్రానికి ఆర్థిక వనరులు సమకూర్చలేని పరిస్థితిలో కమల్ ఈ చిత్రానికి అప్పట్లో ఫుల్‌స్టాప్ పెట్టారు.

ఆ రకంగా అటకెక్కించిన ‘మరుదనాయగమ్’ని మళ్లీ తెరకెక్కించడానికి కమల్ సన్నాహాలు చేస్తున్నారట. దాదాపు 150 కోట్ల రూపాయల బడ్జెట్‌తో తమిళ్, హిందీ, తెలుగు, ఇంగ్లిష్ భాషల్లో ఈ చిత్రాన్ని రూపొందించాలనుకుంటున్నారని ఆ పత్రిక ఓ కథనం ప్రచురించింది. ఈ చిత్రం గురించి కమల్ చెప్పినప్పుడు మళ్లీ రజనీతో కలిసి నటించే అవకాశం ఉందా? అని ఆ పత్రికవారు అడిగితే -‘‘ఆ టైమ్ వచ్చేసింది. మేమిద్దం కలిసి సుమారు 10 సినిమాల్లో యాక్ట్ చేశాం.

ఇన్నేళ్లల్లో మాకు అనువుగా ఉండే కథని ఎవరూ తయారు చేయలేదు. అందుకని మేం యాక్ట్ చేయలేదు. అయితే ‘మరుదనాయగమ్’లో రజనీకాంత్‌కి నప్పే కీలకమైన పాత్ర ఒకటుంది’’ అన్నారట. ఈ వార్త వచ్చిన నేపథ్యంలో రజనీకాంత్ చేయబోతున్న అతిథి పాత్ర ఎలా ఉంటుంది? అనే చర్చలు జోరుగా సాగుతున్నాయి. అదే నిజమైతే 25 ఏళ్ల తర్వాత వీరిద్దరూ కలిసి నటించడం జరుగుతున్నట్లు అవుతుంది. ప్రస్తుతం కమల్‌హాసన్ ‘విశ్వరూబమ్’ చిత్రంలో నటిస్తూ, దర్శకత్వం వహిస్తున్నారు. ఈ చిత్రం తర్వాత ‘మరుదనాయగమ్’ని ఆరంభించాలనుకుంటున్నారని కోలివుడ్ వర్గాలు అంటున్నాయి.