Posted: 02/17/2012 04:03 PM IST

ఆస్ట్రేలియన్‌ మాజీ ఆల్‌-రౌండర్‌, మోస్ట్‌ టాలెంటెడ్‌ ఆండ్రూ సైమండ్స్‌ అన్నిరకాల క్రికెట్‌కూ గుడ్‌బై చెప్తున్నట్లు ప్రకటించాడు. కెరీర్‌ మొత్తం గొడవలూ, కాంట్రవర్సీలతో కాలక్షేపం చేసిన 36 ఏళ్ల సైమో కుటుంబ కారణాల వలన తన క్రికెట్‌ జీవితానికి ముగింపు పలుకుతున్నట్లు తెలిపాడు. మూడేళ్ల క్రితం ఇంగ్లండ్‌లో జరిగిన వరల్డ్‌ టీ20 మధ్యలోనే అర్థంతరంగా క్రికెట్‌ ఆస్ట్రేలియా బయటకు పంపించడంతో అప్పటినుంచి ఒక్క అంతర్జాతీయ మ్యాచ్‌కూడా ఆడలేదు. కాని దేశీయ క్రికెట్‌లో పాలుపంచుకున్నాడు. ఇక చెప్పుకోడానికి ఉన్న ఏకైక కాంట్రాక్ట్‌ ఐపీఎల్‌లో ముంబై ఇండియన్స్‌. కాని ఈ ఏడాది ఐపీఎల్‌లో పాల్గొనలేనని చెప్పాడు. ‘‘తక్షణమే క్రికెట్‌నుంచి వైదొలుగుతున్నాను. అన్నిరకాల క్రికెట్‌కు రిటైర్మెంట్‌ చెప్తున్నాను’’ అని సైమండ్స్‌ ప్రకటించాడు. ‘‘ముంబై ఇండియన్స్‌ కాంట్రాక్ట్‌కు ఇదే చివరి ఏడాది కాని దాన్ని ఫుల్‌ ఫిల్‌ చేయలేకపోతున్నందుకు విచారిస్తున్నాను. ముంబై ఇండియన్స్‌, ఐపీఎల్‌ చాలా సపోర్ట్‌ను ఇచ్చాయి. కాని నా మొదటి సంతానం కారణంగా వీటికి దూరంగా ఉండాలని భావిస్తున్నాను’’ అని సైమో తలిపాడు.

సైమండ్స్‌కు ఎంత టాలెంట్‌ ఉన్నా అతడు ఎల్లపుడూ వివాదాలతో సావాసం చేస్తుండడం అతడిని క్రికెట్‌లో ఏకాకిగా నిలుచోబెట్టింది. మద్యానికి బానిసైన సైమోను సెలెక్టర్లు 2005ఇంగ్లండ్‌ టూర్‌ నుంచి తొలగించారు. బంగ్లాదేశ్‌తో సిరీస్‌ సందర్భంలో పబ్‌లో ఫుల్‌గా తాగి గొడవపడడం సైమోను దోషిగా నిలబెట్టాయి. ఇక సైమో జీవితంలో మర్చిపోలేని వివాదం 2008 జనవరిలో జరిగింది.భారత్‌తో జరిగిన సిడ్నీ టెస్టులో సైమో-భజ్జీ వివాదం అతడి కెరీర్‌లో ఓ మచ్చలా ముద్రపడిపోయింది. భజ్జీ తనను జాతిపరంగా తిట్టాడని అప్పట్లో సైమో వివాదాస్పదమయ్యాడు. ఆతర్వాత జరిగిన పరిణామాలతో భజ్జీ బ్యాన్‌ నుంచి ఫైన్‌ తో సరిపెట్టుకున్నాడు. కాని సైమో మాత్రం ఆస్ట్రేలియా-బీసీసీఐ కుమ్మకై్క వివాదాన్ని నీరుగార్చాయని ఆరోపణలు చేశాడు.

ఈ ఆరోపణలే అతడి క్రీడా జీవితాన్ని మసకబార్చాయి. ఆతర్వాత ఏడాది సైమోను ఇంటర్నేషనల్‌ క్రికెట్‌నుంచి దూరం చేశాయి. బంగ్లాదేశ్‌ టూర్‌ నేపథ్యంలో ఏర్పాటు చేసిన టీమ్‌ మీటింగ్‌ను ఎగ్గోట్టి చేపల వేటకు వెళ్లాడు. దీన్ని క్రికెట్‌ ఆస్ట్రేలియా తీవ్రంగా పరిగణించింది. దీంతో ఆతర్వాత జరిగిన భారత్‌ టూర్‌, సౌతాఫ్రికా టూర్లకు అతడిని ఎంపిక చేయలేదు. ఇక 2009లో ఇంగ్లండ్‌ లో జరిగిన టీ20వరల్డ్‌ కప్‌కు సైమోను నిరూపించుకునేందుకు అతడికి మరో ఛాన్స్‌ను ఇచ్చారు. కాని అక్కడ మద్యం సేవించి గొడవకు దిగాడన్న కారణంతో మధ్యలోనే అతడిని జట్టునుంచి తప్పించారు. దీంతో అతడి ఇంటర్నేషనల్‌ క్రికెట్‌ కెరీర్‌కు తెరపడింది.

వరల్డ్‌ కప్‌ విన్నర్‌ ఆస్ట్రేలియన్‌ పోరాట యోధుడు ఆండ్రూ సైమండ్స్‌ రెండు సార్లు వరల్డ్‌ కప్‌ ఛాంపియన్‌గా నిలిచిన ఆసీస్‌ జట్టులో భాగస్థుడయ్యాడు. పరిమిత ఓవర్ల క్రికెట్‌లో సైమండ్స్‌ మాస్టర్‌ గా పేరుపొందాడు. బ్యాటింగ్‌లో ప్రత్యర్థులకు చుక్కలు చూపించాలన్నా.. బెబ్బులిలా ఫీల్డింగ్‌ చేయాలన్నా సైమోవల్లే సాధ్యం. అదీగాక బంతితో మీడియం పేస్‌, స్పిన్‌ బౌలింగ్‌ వేయగల సమర్థుడు. ఈ సమర్థతే అతడికి అప్పటికే లెజెండ్స్‌తో నిండిపోయిన జట్టులోకి తీసుకొచ్చింది. 2000 దశకం మొదట్లో అతడి ఆటను చూసి అందరూ విస్మయం చెందారు. 2003వరల్డ్‌ కప్‌లో అతడు పాకిస్తాన్‌ పై బాదిన సెంచరీ షేన్‌ వార్న్‌ వల్ల మసకబారింది. అతడి హీరోయిక్‌ సెంచరీ తర్వాత వార్న్‌డోపింగ్‌లో పట్టుబడిపోయాడు. ఆతర్వాత అతడు వన్డే క్రికెట్‌లో ఏకాకిగా మిగిలిపోయాడు.