Posted: 01/05/2012 03:58 PM IST

ఇరుగు పొరుగుల మధ్య గొడవ జరిగి, అది చెయి చేసుకునేవరకూ వచ్చి, విషయం పోలీస్ స్టేషన్ వరకూ సాగింది. పోలీస్ కాన్ స్టేబుల్స్ వచ్చారు. ఇటు వైపు వారు, అటు వైపు వారు అతని దగ్గర తమ తమ గోడు వెళ్ళబోసుకున్నారు. ఓపిగ్గా విన్నాడు ఆ పోలీస్ కాన్ స్టేబుల్ ఇద్దరూ అతని చేతులు కూడా తడిపారు. అయితే తీరా పోలీస్ స్టేషన్ ఇన్ ఛార్జ్ దగ్గరకు పోయినప్పుడు మళ్ళీ తంతంతా పునప్రారంభమైంది. ఆయన కూడా అంతా విన్న తర్వాత ఇరు వైపుల వారూ తగ్గక పోయేసరికి గొడవ కాస్తా కోర్టు వరకూ పోయింది. అక్కడ వాదోపవాదాలు మళ్ళీ మొదలు.

ఢిల్లీ నుంచి రాష్ట్ర వ్యవహారాలను పర్యవేక్షించే గులామ్ నబీ ఆజాద్ నిన్న హైద్రాబాద్ వచ్చారు. నిన్నటి నుంచీ నాయకులంతా ఎవరికి వారు విడివడిగా కలుస్తూనేవున్నారు. తమ తమ అభిప్రాయాలను, సూచనలను, తమ కోరికలను వెళ్ళబుచ్చుతూనేవున్నారు. ముఖ్యమంత్రి మీదా ఇతర నాయకులమీద పరస్పరం ఆరోపణలు చేసుకున్నారు. ఆజాద్ అంతా ఓపిగ్గా వింటూవస్తున్నారు. తెలంగాణా గురించి చేసిన ఆందోళన విషయంలో కూడా ఆయన అలాగే అన్ని వైపులవారి అభిప్రాయాలనూ తీసుకున్నారు. ఎంతో ఓపికగా అన్ని వాదనలూ విన్నారు.

ఈరోజు జరిగే సమన్వయ కమిటీలో నిశ్చితమైన అజెండా ఏమీ లేదట. కేవలం ప్రాథమిక సమావేశమేనట. సమన్వయం మాత్రమే లక్ష్యమని ఆజాద్ తెలియజేసారు. అసలు ఎందుకు వచ్చారని ఎవరూ అడగలేదు. కేంద్ర మంత్రిగా రాలేదని చెప్పకనే చెప్తున్నారు. పార్టీ తరఫున సమన్వయ కర్తగా వచ్చిన ఆజాద్ కి ప్రతి ఒక్కరూ తమ తమ బాధలను వెళ్లబోసుకున్నారు. అందులో అధిష్టానం వరకూ ఎన్ని వెళ్తాయో ఎవరికీ తెలియదు. ఇవేమీ వినకుండానే అధిష్టానం ఏదైనా ఆదేశం జారీ చేస్తే ఆజాద్ కి చెప్పుకున్నవన్నీ వ్యర్థమైనట్టే. కానీ ఆ ఆలోచన ఎవరికీ ఉండదు. ఎవరికి వారు తమ మౌఖిక అర్జీలను దాఖలు చేసేసుకుంటున్నారు.

-శ్రీజ