Posted: 01/03/2012 04:29 PM IST

వైయస్ జగన్ అక్రమ ఆస్తులను దర్యాప్తు చేస్తున్న సిబిఐ నిన్న విజయసాయిరెడ్డిని అరెస్ట్ చేసింది. వైయస్ ఆర్ కుటుంబంతో 20 సంవత్సరాలుగా సన్నిహిత సంబంధమున్న విజయసాయి రెడ్డి అరెస్ట్ కి అన్నివిధాలా సంసిద్ధులై ఉన్నట్టుగా తెలుస్తోంది. నెల్లూరు వాసియైన విజయసాయి రెడ్డి ఒక సీనియర్ ఐపిఎస్ ఆఫీసర్ గా వైయస్ఆర్ కీ ఆయన కుమారుడు వైయస్ జగన్ కీ అత్యంత సన్నిహితుడిగా సలహాదారుగా వ్యవహరించారు. జగతి పబ్లికేషన్స్ వ్యవహారాలను మొదటి నుంచీ ఆయనే చక్కబెడుతున్నారు. ప్రతివిషయాన్నీ సూక్ష్మంగా తెలుసుకునే అలవాటున్న విజయసాయిరెడ్డి, చంచలగూడ జైలులో ఏ కేటగరీ సెల్ ఎలా ఉంటుంది, ఎందులో ఎలాంటి వసతులుంటాయన్న వివరాలు సహితం సేకరించారట. తనని అరెస్ట్ చేస్తారని తెలిసిన విజయసాయి రెడ్డి చంచల్ గూడా జైల్ వివరాలను క్షుణ్ణంగా తెలుసుకున్నారు. ఆ వివరాల్లో ఎ క్లాస్ సెల్ లో టివి ఛానెల్స్ అన్నీ వస్తాయమని కూడా ఉంది. జైలులో ఉండటానికి మానసికంగా సిద్ధపడ్డ ఆయన యోగ లో ప్రత్యేక శిక్షణ కూడా తీసుకుని మనసుని అదుపులో పెట్టుకుంటూ ప్రశాంతంగా ఉంటుకోవటానికి అవసరమైన విధానాలను తెలుసుకున్నారు. జైలు అధికారులలో వివిధ శ్రేణులలో పని చేసేవారి పేర్లు కూడా ఆయన తెలుసుకుని పెట్టుకున్నారు. లోగడ ఆయన, జగన్ కి కిట్టని వారి వలన తన ప్రాణానికి హాని ఉందని, తనకు రక్షణ కలుగజేయమని ప్రభుత్వాన్ని కోరారు. దానితో ఆయనకు ప్రభుత్వం కేటాయించిన నలుగురు పెర్సనల్ సెక్యూరిటీ ఆఫీసర్లను అరెస్ట్ అవటం వలన ఉపసంహరించుకుంది.

విజయసాయి రెడ్డిని సిబిఐ విచారణకు ఎన్నో సార్లు పిలవటం జరిగింది. ఆయన ఎప్పుడూ తను చెప్పదలచుకున్న విషయాలను ప్రశాంతంగానే చెప్పారు. విచారణకు వెళ్ళే ముందు, అయిపోయిన తర్వాత కూడా ఆయన ఒకేలా కనిపించారు. అది మేకపోతు గాంభీర్యమేమో అని అన్న వాళ్లూ ఉన్నారు.

-శ్రీజ