Posted: 12/10/2011 03:06 PM IST

తనకేంటి... గోల్డెన్ స్పూన్‌తో పుట్టింది. కష్టాలెలా ఉంటాయో అస్సలు తెలియదు. ఇంకా చెప్పాలంటే తను మహారాణిలాంటిది’’ అని కరీనాకపూర్ గురించి బాలీవుడ్‌లో చాలామంది మాట్లాడుకుంటారు. ఆ మాటల్లో చాలా నిజముంది. బాలీవుడ్‌కి చెందిన ప్రముఖ కుటుంబాల్లో కరీనా కుటుంబం ఒకటి. బెబోది (కరీనా ముద్దు పేరు) రాణీవైభవం అనమాట. ఆమె కంట తడిపెడితే మొత్తం కుటుంబమంతా కంగారుపడిపోతారు. కరీనా మనసు నొప్పించే విధంగా నడుచుకోవడానికి కూడా కుటుంబ సభ్యులు ఇష్టపడరు. అంత సుకుమారంగా, గారాబంగా చూసుకుంటారు బెబోని. అంత అందమైన జీవితం గడుపుతున్న బెబో ఇటీవల కన్నీరు మున్నీరుగా విలపించారు. అయితే ఈ ఏడుపు బెబో వ్యక్తిగత జీవితానికి సంబంధించినది కాదు.

ప్రస్తుతం ఆమె ‘హీరోయిన్’ అనే చిత్రంలో హీరోయిన్‌గా నటిస్తున్నారు. ఓ నటి తన జీవితంలో ఎదుర్కొనే ఎత్తుపల్లాల సమాహారంతో దర్శకుడు మధూర్‌బండార్కర్ ఈ చిత్రాన్ని రూపొందిస్తున్నారు. ఈ చిత్రంలో కరీనా పూర్తిగా లీనమై నటిస్తున్నారట. నటి జీవితంలో ఉండే సమస్యలకు సంబంధించి ఇటీవల ఓ సన్నివేశం తీస్తున్నప్పుడు ఆమె కదిలిపోయారట. నిజంగానే కథానాయికలు ఇలాంటి సమస్యలు ఎదుర్కొంటారా? అంటూ బాధ తట్టుకోలేక ఏడ్చారట. 

కరీనాకి ఫిల్మీ బ్యాక్‌గ్రౌండ్ ఉంది కాబట్టి సినిమా పరిశ్రమలో ఆమెకు తగిన రీతిలో గౌరవ, మర్యాదలు ఇస్తారు. ఆమె అడుగులకు మడుగులొత్తేవాళ్లే ఎక్కువ. అందుకని హీరోయిన్ల విషయంలో జరిగే అవమానాలు, లైంగిక వేధింపులేవీ కరీనాకి తెలియవు. ఇప్పుడిది హీరోయిన్ల జీవితాలను ఆధారం చేసుకుని తీస్తున్న సినిమా కావడంతో.. వారి కష్టాలెలా ఉంటాయో తెలుసుకునే వీలు కరీనాకి కలిగింది. ఆ కష్టాలు తెలుసుకునే ఆమె ఏడ్చారట. కరీనా సున్నిత మనస్కురాలడానికి ఇదొక నిదర్శనం. లొకేషన్‌లో చాలాసేపు ఆమె అదే మూడ్‌లో ఉండిపోయారని, కరీనా ఈ చిత్రాన్ని చాలా ఓన్ చేసుకుంటున్నారని యూనిట్ సభ్యులు అంటున్నారు.