Posted: 12/10/2011 05:55 PM IST

ఆ రెండు పాత్రలూ ఉత్తర, దక్షిణ ధ్రువాల్లాంటివి. ఒక పాత్రలో సంసారపక్షంగా, మరో పాత్రలో శృంగారభరితంగా నటించాను. ఒకే ఏడాది ఇలా రెండు రకాల పాత్రల్లో నటించి మెప్పించగలిగినందుకు ఆనందంగా ఉంది’’ అన్నారు విద్యాబాలన్. ఈ ఏడాది ఆరంభంలో విడుదలైన ‘నో ఒన్ కిల్డ్ జెస్సికా’ చిత్రంలో చేసిన సబ్రినా లాల్, ఇటీవల విడుదలైన ‘ది డర్టీ పిక్చర్’లో చేసిన సిల్క్ పాత్రల గురించే ఆమె పై విధంగా స్పందించారు. బాలీవుడ్‌లో ‘పరిణీత’ చిత్రంతో కెరీర్ ఆరంభించి ‘హోమ్లీ గాళ్’ ఇమేజ్ తెచ్చుకున్న విద్యాబాలన్ ‘ది డర్టీ పిక్చర్’లో హద్దులు దాటి శృంగార ప్రదర్శన చేశారు. 

ఈ చిత్రం విడుదల కాకముందు పోస్టర్స్‌లో విద్యా తెగువ చూసి చాలామంది ఖంగు తిన్నారు. సినిమా విడుదలైన తర్వాత విమర్శనాస్త్రాలు సంధించాలని కూడా చాలామంది ఫిక్స్ అయ్యారు. కానీ అలాంటివారు సైతం ‘‘విద్యాబాలన్ నటన సుపర్బ్. ఏ పాత్రనైనా చెయ్యగలవాళ్లే మంచి ఆర్టిస్టులు కింద లెక్క. హోమ్లీ పాత్రల్లో నిరూపించుకున్న విద్యా ఇప్పుడు గ్లామరస్ గాళ్‌గా కూడా చెయ్యగలనని నిరూపించుకుంది. ‘ది డర్టీ పిక్చర్’ ఒప్పుకోవడం తప్పేం కాదు. ఇందులో పాత్రకు తగ్గట్టుగానే ఆమె నటించింది’’ అంటూ ప్రశంసల వర్షం కురిపిస్తున్నారు. 

ఈ ప్రశంసలకు విద్యా ఆనందం వ్యక్తపరుస్తూ -‘‘నేను ఏ పాత్ర అయినా సరే ఒక కమిట్‌మెంట్‌తో చేస్తా. అందుకే సక్సెస్ అవుతా. నిజానికి ఈత కొలనులో జలకాలాట సాగిస్తానని, హీరో నా చీర విప్పడానికి ప్రయత్నం చేసే సన్నివేశాల్లో నటిస్తానని, హీరోని రెచ్చగొట్టేట్లు నటిస్తానని నేనూహించలేదు. ఇవన్నీ డర్టీ పిక్చర్‌లో చేశాను. కానీ ప్రేక్షకులకు అసహ్యం కలిగించే విధంగా చేయకపోవడంవల్ల సక్సెస్ అవ్వగలిగాను’’ అన్నారు. ఈ చిత్రం తర్వాత విద్యాబాలన్ క్రేజ్ అమాంతం పెరిగింది. ఫలితంగా ఆమె పారితోషికం పెంచేశారట. ఆమె ఎంత కోరితే అంత ఇవ్వడానికి నిర్మాతలు కూడా సిద్ధపడుతున్నారని సమాచారం. 

మొత్తం మీద 2011 ఆరభంలో ‘నో ఒన్ కిల్డ్ జెస్సికా’లాంటి హిట్ అందుకున్న విద్యా.. ఏడాది చివర్లో ‘ది డర్టీ పిక్చర్’తో విజయానందాన్ని చవిచూస్తున్నారు. కొత్త సంవత్సరానికి ఉత్సాహంగా ఆహ్వానం పలకడానికి రెడీ అవుతున్నారామె. ఇదిలా ఉంటే... ‘డర్టీ పిక్చర్’ ఇన్‌స్పిరేషన్‌తో ఇప్పుడు కొంతమంది బాలీవుడ్ నిర్మాతలు డర్టీ పిక్చర్లు తీయడానికి సిద్ధపడుతున్నారట. వీటిలో విద్యాబాలన్‌ని నటించమని కోరుతున్నారని వినికిడి. అయితే.. ఈ డర్టీ అవకాశాలను ఈ బ్యూటీ తిరస్కరిస్తున్నారని సమాచారం. గోల్డెన్ వర్డ్స్ ఆర్ నాట్ రిపీటెడ్ అన్నట్లు.. డర్టీ కేరక్టర్స్ ఆర్ నాట్ రిపీటెడ్ అని విద్యా భావిస్తున్నారేమో...!