అన్ని ఫార్మెట్ల క్రికెట్ కు గుడ్ బై చెప్పిన పార్థివ్ పటేల్

Posted: 12/09/2020 04:37 PM IST

టీమిండియా వికెట్‌ కీపర్‌ పార్థివ్ పటేల్‌ సంచలన నిర్ణయం తీసుకున్నాడు, అంతర్జాతీయ క్రికెట్ కు వీడ్కోలు పలికుతున్నట్లు ఇవాళ ప్రకటించాడు. పరిమిత ఓవర్లతో పాటు టెస్టు క్రికెట్ సహా అన్ని ఫార్మాట్లకు ఆయనగుడ్ బై పలుకుతున్నట్లు ట్విటర్‌ మాద్యమం ద్వారా వెల్లడించాడు. క్రికెట్ ప్రపంచంలో అడుగుపెట్టిన అతిపిన్న వయస్కుడిగా గుర్తింపు తెచ్చుకున్న పార్థీవ్ 18 ఏళ్ల తన క్రికెట్‌ ప్రయాణాన్ని ముగిస్తున్నట్లు ప్రకటించాడు. టీమిండియా తనపై విశ్వాసాన్ని ఉంచి 17 ఏళ్ల వయసులోనే అవకాశం కల్పించిందని ఆయన భావోద్వేగంతో పేర్కొన్నాడు. భారత్ తరఫున పార్థివ్‌ 25 టెస్టులు, 38 వన్డేలు, రెండు టీ20లు ఆడాడు. శ్రీలంకతో 2012లో చివరి వన్డే ఆడాడు.

‘‘అన్ని ఫార్మాట్ల క్రికెట్‌కు వీడ్కోలు ప్రకటిస్తున్నా. 18 ఏళ్ల నా క్రికెట్ ప్రయాణాన్ని నేటితో ముగిస్తున్నా. నా కెరీర్‌లో సాయం చేసిన ప్రతి ఒక్కరికి కృతజ్ఞతలు. 17 ఏళ్ల వయసులో నాపై విశ్వాసాన్ని ఉంచి బీసీసీఐ అవకాశం ఇచ్చింది. కెరీర్‌లో మార్గదర్శకం చేస్తూ అండగా నిలిచిన అందరికీ ధన్యవాదాలు’’ అని పార్థివ్‌ పేర్కొన్నాడు. కెప్టెన్లందరికీ కృతజ్ఞతలు తెలిపాడు. తొలి అవకాశం ఇచ్చిన గంగూలీకి ప్రత్యేక ధన్యవాదాలు చెప్పాడు. 2002లో దాదా కెప్టెన్సీలోనే పార్థివ్‌ ఇంగ్లాండ్ టెస్టుతో అంతర్జాతీయ క్రికెట్‌ అరంగేట్రం చేశాడు.

పార్థివ్‌ పటేల్ తన సుదీర్ఘ క్రికెట్ కెరీర్ లో టెస్టుల్లో 934, వన్డేల్లో 1696 పరుగులు సాధించాడు. అయితే అంతర్జాతీయ క్రికెట్‌ పాటు పోటీ క్రికెట్‌ నుంచి తప్పుకున్నట్లు పార్థివ్‌ వెల్లడించాడు. ఐపీఎల్‌ లో తనకు అవకాశాలు ఇచ్చిన జట్లకు కృతజ్ఞతలు తెలిపాడు. ఓపెనర్ గా మెరుపు ఇన్నింగ్స్ లు ఆడిన అతడు లీగ్ ‌లో 2848 పరుగులు చేశాడు. 13వ సీజన్లో బెంగళూరు జట్టులో తరపున ప్రాతినిధ్యం వహించినా.. ఆయనకు ఆడే అవకాశం మాత్రం రాలేదు, గత 13 సీజన్లలో అతడు ముంబయి, చెన్నై, బెంగళూరు జట్టుకు ప్రాతినిధ్యం వహించాడు. కాగా, దేశవాళీలో 194 ఫస్ట్ క్లాస్ మ్యాచ్ ల్లో 11,240 పరుగులు చేయగా, అందులో 27 శతకాలతో సత్తా చాటాడు.