విరాట్-అనుష్కలు జాతి వ్యతిరేకులా..?

Posted: 12/19/2017 06:31 PM IST

టీమిండియా కెప్టెన్ విరాట్ కోహ్లీ, బాలీవుడ్ నటి అనుష్క శర్మల ప్రేమజంట ఇటీవలే పెళ్లి చేసుకున్నారు. అయితే వారి వివాహన్ని ఇటు దేశంలోని ప్రముఖులతో పాటు విదేశాలకు చెందిన అనేక మంది ప్రముఖులు అభినందనలు తెలిపిన విషయం కూడా తెలిసిందే. కాగా ఓ బీజేపి నేతకు మాత్రం వారు ఇటలీలో పెళ్ళి చేసుకోవడంపై రుచించినట్టుగా లేదు. అందుకనే ఆయన ఏకంగా విరుష్కల వివాహాన్ని కూడా వివాదాస్పదం చేశారు.

మధ్యప్రదేశ్ బీజేపీ ఎమ్మెల్యే పన్నాలాల్ విరుష్క కల్యాణంపై బహిరంగ సభలో మాట్లాడుతూ వివాదాస్పద వ్యాఖ్యలు చేశారు. భారతదేశంలో శ్రీరాముడు, శ్రీకృష్ణుడు, విక్రమాదిత్యుడు, యుధిష్ఠిరుడు వంటి మహనీయులు వివాహాలు చేసుకున్నారన్నారు. ఇంతటి గోప్ప దేశంలో.. అందులోనూ వివాహ వైశిష్టంపై, సంప్రదాయాలు వున్న దేశంలో కాకుండా ఎక్కడో పరదేశంలో పెళ్లి చేసుకోవడంపై ఆయన ప్రశ్నలు సంధించారు.  

భారత దేశం లాంటి ఫుణ్యభూమిలో జన్మించి.. డబ్బు, పేరు, ప్రతిష్ఠలు సంపాదించుకుని విదేశాలలో వివాహం చేసుకోవడం ఏంటని ప్రశ్నించారు. యువత విరుష్క జంటన అదర్శంగా తీసుకోకూడదని కూడా పిలుపునిచ్చారు. వీరిద్దరూ భారతదేశంలో ఎందుకు పెళ్ళి చేసుకోలేదని ప్రశ్నించారు. ఇక్కడి డబ్బు కావాలి, ఇక్కడ పేరు ప్రఖ్యాతులు కావాలి, కానీ విదేశాలలో పెళ్లిలా.? అంటూ ప్రశ్నించారు.

కాగా విరాట్ కోహ్లీ అభిమానులు మాత్రం బీజేపి నేత ప్రశ్నలపై ధీటుగానే సమాధానమిస్తున్నారు. విరాట్ కోహ్లీ ఎక్కడ పెళ్లి చేసుకున్నాడన్న విషయం ప్రాధాన్యత సంతరించుకోదని, అయితే వారు ఏ సంప్రదాయంలో పెళ్లి చేసుకున్నారన్నదే ముఖ్యమని వాదిస్తున్నారు. వారు హిందూ సంప్రదాయంలోనే పెళ్లి చేసుకున్నారని అంటున్నారు.