నల్ల కలువకు జర్మనీ భామ షాక్

Posted: 07/02/2013 11:26 AM IST

ఈ ఏడాది సంచలనాలకు వేదికగా నిలుస్తున్న వింబుల్డన్ గ్రాండ్‌స్లామ్ టెన్నిస్ టోర్నమెంట్‌లో మరో సంచలనం నమోదు అయింది. మహిళల సింగిల్స్‌లో ప్రపంచ నంబర్‌వన్, టాప్ సీడ్ సెరెనా విలియమ్స్ జోరుకు జర్మనీ బ్యూ సబైన్ లిసికి ’ అడ్డుకట్ట వేసింది. కళ్లు చెదిరే ఆట తీరుతో అమెరికా నల్లకలువ ను ఇంటిముఖం పట్టించి క్వార్టర్ ఫైనల్లోకి దూసుకెళ్లింది. టాప్ సీడ్, శక్తివంతమైన క్రీడాకారిణి, ఇప్పటికే 16 గ్రాండ్‌స్లామ్ సింగిల్స్ టైటిల్స్ ఖాతాలో వేసుకున్న సెరెనా విలియమ్స్ తో మ్యాచ్ అంటే కాస్త భయపడాల్సిందే. కానీ యువతార అయిన సబైన్ సెరెనాకు ఏ మాత్రం భయపడలేదు. తన అత్యుత్తమ ప్రదర్శన ఇచ్చింది. చివరకు ఎవరూ ఊహించని విధంగా సెరెనా విలియమ్స్‌పై సంచలన విజయం నమోదు చేసింది.  సింగిల్స్ ప్రిక్వార్టర్ ఫైనల్లో 23వ సీడ్ లిసికి 6-2, 1-6, 6-4తో సెరెనాపై గెలిచి క్వార్టర్ ఫైనల్లోకి అడుగుపెట్టింది. 2 గంటల 4 నిమిషాలపాటు జరిగిన ఈ మ్యాచ్‌లో లిసికి 10 ఏస్‌లు సంధించడంతోపాటు నిర్ణాయక మూడో సెట్‌లో వరుసగా మూడుసార్లు సెరెనా సర్వీస్‌ను బ్రేక్ చేసింది. దీంతో అందరి కళ్ళు ఈ అమ్మడు పై పడే విధంగా చేసుకుంది. ముందు ముందు మరిన్ని సంచలనాలు క్రియేట్ చేస్తుందో చూడాలి.