విండీస్ రెండో విజయం

Posted: 07/01/2013 11:03 AM IST

ఛాంపియన్స్ ట్రోఫ్రీ విజయంతో విండీస్ గడ్డపై ముక్కోణపు సిరీస్ కోసం అడుగు పెట్టిన ధోని సేనకు ఎదురుదెబ్బ తగిలింది. నిన్న రాత్రి ఆతిధ్య జట్టుతో జరిగిన తొలి మ్యాచ్ లో ధోని సేన ఒక్క వికెట్ తేడాతో పరాజయం పాలైంది. టాస్ ఓడి బ్యాటింగ్‌కు దిగిన టీమిండియా నిర్ణీత ఓవర్లలో ఏడు వికెట్లకు 229 పరుగులు చేసింది. భారత్ నిర్దేశించిన 230 పరుగుల లక్ష్యాన్ని మరో 2.2 ఓవర్లు ఉండగానే తొమ్మిది వికెట్లు కోల్పోయి విండీస్ చేధించింది. రోహిత్ శర్మ (60) హాఫ్ సెంచరీకి తోడు రైనా (44) రాణించడంతో మినహా ఇతర బ్యాట్స్‌మెన్ నిరాశపరిచారు. ధోనీ (27), దినేశ్ కార్తీక్ (23) ఫర్వాలేదనిపించినా భారీ స్కోర్లుగా మలచలేకపోయారు. టాపార్డర్‌లో ధావన్ (11), కోహ్లీ (11) విఫలమవ్వడంతో భారీ స్కోరు సాధించలేక పోయారు.  230 పరుగుల విజయలక్ష్యంతో బ్యాటింగ్ ప్రారంభించిన వెస్టిండీస్ 9 వికెట్లు కోల్పోయి 47.4 ఓవర్లలో 230 పరుగులు చేసింది. దాంతో విండీస్ జట్టు ఒక వికెట్ తేడాతో గెలుపొందింది. ఓపెనర్ చార్లెస్ (97) ఒంటరి పోరాటంతో విండీస్ జట్టు విజయంలో కీలక పాత్ర పోషించాడు. అయితే 40.2 ఓవర్ లో యాదవ్ బౌలింగ్ లో చార్లెస్ అవుట్ కావడంతో విండీస్ కష్టాల్లో పడినట్టు కనిపించింది. కాని రోచ్, బెస్ట్ లు చివర్లో వికెట్ కోల్పోకుండా జాగ్రత్తగా ఆడి విండీస్ జట్టుకు విజయాన్ని అందించారు. భారత బౌలర్లలో యాదవ్ 3, శర్మ, అశ్విన్ రెండేసి వికెట్లు పడగొట్టారు. విండీస్ బౌలర్లలో రోచ్, బెస్ట్, సమ్మి రెండేసీ వికెట్లు, శ్యామ్యూల్ ఒక వికెట్ పడగొట్టారు.