శ్రీలంకను చిత్తు చేసింది

Posted: 06/29/2013 10:11 AM IST

విండీస్ లో జరుగుతున్న ముక్కోణపు వన్డే సిలికాన్ కప్ సిరీస్ లో సొంత గడ్డపై ఆ జట్టు భోణి కొట్టింది. ఈ టోర్నీలో భాగంగా శ్రీలంకతో జరిగిన మొదటి మ్యాచ్ లో విండీస్ లంకేయుల పై 6 వికెట్ల తేడాతో ఘనవిజయం సాధించింది. మొదట టాస్ గెలిచి విండీస్ లంకను బ్యాటింగ్ కి ఆహ్వానించింది. బ్యాటింగ్ కి దిగిన శ్రీలంక జట్టు 48.3 ఓవర్లలో ఆలౌట్ అయ్యి,  208 పరుగులు సాధించింది.  మహేల (52), మాథ్యూస్ (55 నాటౌట్) ఆదుకోవడంతో ఈ మాత్రం స్కోరైనా చేయగలిగింది. ఓపెనింగ్ జోడీ తరంగ, మహేల 62 పరుగుల శుభారంభం అందించినా.. ఆనక లంక క్రమం త ప్పకుండా వికెట్లు కోల్పోయింది. తరంగ (25), చాందిమల్ (21), సంగక్కర (17) రెండంకెల పరుగులు చేసినా భారీ స్కోర్లుగా మలచలేకపోయారు. 209 పరుగుల లక్ష్యంతో బరిలోకి దిగిన వెస్టిండీస్ జట్టులో క్రిస్ గేల్ తనదైన శైలిలో ఆడుతూ.. స్కోరును పరుగులెత్తించాడు. క్రిస్ గేల్ 100 బంతుల్లో 9 ఫోర్లు 7 సిక్సర్లతో 109 పరుగులు చేశాడు. చార్లెస్ 29, బ్రావో 27,శ్యామ్యూల్ 15 పరుగులు చేసి జట్టుకు విజయాన్ని అందించారు. కులశేఖర, హెరాత్ కు చెరో వికెట్ లభించింది. విండీస్ బౌలర్లలో నరైన్ నాలుగు, రాంపాల్ మూడు, డ్వెన్ బ్రావో రెండు వికెట్లు తీశారు. ప్లేయర్ ఆఫ్ ది మ్యాచ్ గా క్రిస్ గేల్ ఎంపికయ్యాడు.