హర్భజన్ ఓ వెన్నుపోటు దారు- శ్రీశాంత్

Posted: 04/13/2013 01:42 PM IST

ఐదేళ్ల క్రితం తీవ్ర దుమారం రేపిన 'చెంపదెబ్బ' వివాదం మళ్లీ తెరపైకి వచ్చింది. ఐపీఎల్ తొలి అంచె పోటీల సందర్భంగా జరిగిన ఈ ఘటనకు మూలకారణమైన హర్భజన్ సింగ్‌ను 'వెన్నుపోటు దారు' అంటూ తాజాగా మరో వివాదానికి తె రలేపాడు శ్రీశాంత్. అప్పుడు జరిగిన ఈ సంఘటన అనుకోకుండా చోటుచేసుకుంది కాదని అదంతా ఓ ప్రణాళిక ప్రకారమే జరిగిందని ఈ కేరళ స్పీడ్‌స్టర్ ఆరోపించాడు. కెరీర్‌లో విజయాలకంటే వివాదాలతోనే ఎక్కువ ప్రాచుర్యం పొందిన శ్రీ.. అప్పటి సంఘటనపై ట్విట్లర్లో వరుస ట్వీట్లు చేశాడు. 'అప్పట్లో నేనేమీ మాట్లాడలేదు. కానీ ఇప్పుడు అందరికీ వాస్తవమేంటో తెలియాలి. భజ్జీ నన్ను చెంపదెబ్బ కొట్టలేదు. అయితే నేను ఉద్వేగంతో ఏడ్చినందుకు అంతా నన్ను నిందించారు. కానీ, కొట్టలేదని మీరంతా నమ్ముతున్న వ్యక్తి (భజ్జీ) వెన్నుపోటుదారు' అని ట్వి ట్టర్‌లో పేర్కొన్నాడు.

ఈ వ్యవహారంపై భజ్జీ బాధపడాలనేది తన ఉద్దేశం కాదని, అప్పుడేం జరిగిందో అందరికీ తెలియాలనే ఇలా చెబుతున్నానని అన్నా డు. 'వాస్తవమేమిటో ప్రపంచానికి తెలియాలని అనుకుంటున్నా. భజ్జీ నన్ను చెంపదెబ్బ కొట్టారని అంతా అనుకుంటున్నారు. కానీ అంతకన్నా ఎక్కువే జరిగింది. మ్యాచ్ అనంతరం షేక్‌హ్యాండ్ ఇచ్చేందుకు వెళ్లాం. నన్ను కొట్టేందుకు భజ్జీ ముందుగానే ప్రణాళిక వేసుకున్నాడు. తన కోపాన్నంతా ప్రదర్శిస్తూ నన్ను మోచేతితో కొట్టాడు. అతడా సమయంలో కోపాన్ని నియంత్రించుకోలేకపోయాడు. ఇందులో నా తప్పేమీ లేదు. కానీ నిజా నిజాలు తెలుసుకోకుండా అందరూ నన్నే నిందించారు. అయితే నిజం ఏమిటో తెలిపే వీడియో ఐపీఎల్ యాజమాన్యం దగ్గర వుంది' అని చెప్పాడు. ఐపీఎల్‌లోగానీ, క్రికెట్‌లోగానీ ఇలాంటి సంఘటనలు జరగకూడదని శ్రీ అన్నాడు. ఇప్పుడీ విషయాన్ని లేవనెత్తడం సమంజసం కాదన్న విషయం తెలుసనీ అయితే ఒక్క నిమిషం తన స్థానంలో ఉండి ఆలోచించాలని శ్రీ వేడుకున్నాడు.