నైట్ రైటర్స్ కు చుక్కలు చూపించిన గెల్స్ ?

Posted: 04/12/2013 02:30 PM IST

డిపెండింగ్‌ ఛాంపియన్‌ కోల్‌కతా నైట్‌రైడర్స్‌కు బెంగళూరు ఛాలెంజర్స్‌ చిన్నస్వామి స్టేడియంలో చుక్కలు చూపించారు. ఎనిమిది వికెట్‌ల తేడాతో చిత్తుచేశారు. ఏ క్షణంలోనూ నైట్‌ రైడర్స్‌కు ఊరితీసుకునే అవకాశమే ఇవ్వలేదు. బౌలర్లు ఆర్పీసింగ్‌, హెన్రిక్వెస్‌, వినయ్‌కుమార్‌ బ్యాట్స్‌మెన్‌ను కట్టడి చేస్తే... మరో వైపు గేల్స్‌, కొహ్లి, డివియల్లర్స్‌ కోల్‌కతా బౌలర్లను ఉతికి ఆరేశారు. దీంతో గంభీర్‌ ఆర్మీ ఛాలెంజర్స్‌ ముందు చతికిలపడిపోయింది. 155 పరుగుల విజయ లక్ష్యంతో బరిలోకి దిగిన బెంగళూరు ఓపెనర్లు క్రిస్‌ గేల్స్‌, అగర్వాల్‌ ఆరంభం నుంచే దూకుడుగా ఆడారు. ఐతే మూడో ఓవర్‌ మూడో బంతికి మెక్‌ లారెన్‌ బౌలింగ్‌లో అగర్వాల్‌ కీపర్‌ బిస్లాకి క్యాచ్‌ ఇచ్చి వెనుతిరిగాడు. లారెన్‌ వేసిన స్లో బంతిని స్వీప్‌ చేయటానికి అగర్వాల్‌ ప్రయత్నించగా...బిస్లా చక్కని డైవ్‌తో క్యాచ్‌ అందుకున్నాడు. అగర్వాల్‌ స్థానంలో వచ్చిన కెప్టెన్‌ కొహ్లీ మైదానంలో వీరంగం తొక్కాడు. ఓ వైపు గేల్స్‌, మరోవైపు కొహ్లి బౌలర్లపై విరుచుకు పడ్డారు. ఫోర్లు, సిక్సర్లతో మోత మోగించారు. నరైన్‌, కలీస్‌, బాలాజీ, లారెన్‌, సంగ్‌వాన్‌.. ఇలా ఏ బౌలర్‌ను వీరిద్దరూ విడిచిపెట్టలేదు. గతి తప్పిన బంతిని బౌండరీకో... స్టాండ్స్‌కో పంపించి బౌలర్లను కసికొద్దీ శిక్షించారు. ఆరవ ఓవర్లో గేల్స్‌, కొహ్లి బౌలర్‌ లారెన్‌కు చుక్కలు చూపించారు. కొహ్లి రెండు ఫోర్లు లాగిస్తే.. గేల్స్‌ రెండు సిక్స్‌లు బాదాడు. వీరిద్దరూ రెండవ వికెట్‌కి కేవలం 41 బంతులో 63 పరుగుల భాగస్వామ్యం నెలకొల్పారు. బాలాజీ వేసిన తొమ్మిదవ ఓవర్‌ తొలిబంతిని కొహ్లి స్వీప్‌ చేయబోయి కవర్స్‌లో మోర్గాన్‌కు దొరికిపోయాడు. 27 బంతుల్లో నాలుగు ఫోర్లు, రెండు సిక్స్‌లతో 35 పరుగులు చేసిన కొహ్లి పెవిలియన్‌కు వెనుతిరిగాడు. కొహ్లిస్థానంలో వచ్చిన డివిల్లియర్స్‌ , గేల్స్‌కు జతకలిశాడు. డివిల్లియర్స్‌ సహకారంతో గేల్స్‌ చెలరేగిపోయాడు. దొరికిన బంతిని కసితీరా స్టాండ్స్‌కు పంపించాడు. బాలాజీ బౌలింగ్‌లో గేల్స్‌ 17.3వ బంతిని సిక్స్‌ కొట్టి బెంగళూరును గెలిపించాడు. కేవలం రెండు వికెట్‌లు కోల్పోయి 158 పరుగులతో ఛాలెంజర్స్‌ విజయాన్ని అందుకున్నారు.