పుణేతో మ్యాచ్ అనాథ పిల్లలకు అంకితం

Posted: 04/12/2013 02:40 PM IST

ఆటలోనే కాదు... దాతృత్వంలోను తాము ముందుంటామని ముంబై ఇండియన్స్ జట్టు నిరూపిస్తోంది. నీతా అంబానీ ఆధ్వర్యంలోని ఈ జట్టు శనివారం పుణేతో జరిగే ఐపీఎల్ మ్యాచ్‌ను అనాథ, వికలాంగ బాలలకు అంకితం ఇవ్వనుంది. ‘అందరికీ విద్య’ అనే చారిటీ కార్యక్రమం కోసం ముంబై ఇండియన్స్ ఈ నిర్ణయం తీసుకుంది ఇక్కడ జరిగిన కార్యక్రమంలో జట్టు సభ్యులు విధి వంచితులైన చిన్నారులతో గడిపారు. వారికి ఆటలోని కిటుకులు నేర్పి ఆత్మవిశ్వాసాన్ని నింపారు. ఈ సందర్భంగా మాస్టర్ బ్యాట్స్‌మన్ సచిన్ టెండూల్కర్ మాట్లాడుతూ... ‘ఇది నాకు ఓ ప్రత్యేకమైన కార్యక్రమం. ఈ చిన్నారుల్లో జాతి గర్వించదగ్గ ప్రతిభ దాగి ఉంది. వారితో గడపడం నాకెంతో ఆనందాన్నిచ్చింది’ అని అన్నాడు. ఈ కార్యక్రమంలో పాల్గొనడం ద్వారా... ఈ బాలల శక్తి గురించి తెలుసుకున్నామని ముంబై కెప్టెన్ రికీ పాంటింగ్ పేర్కొన్నాడు. దాదాపు 8,000 మంది అనాథ, వికలాంగ పిల్లలు శనివారం వాంఖడే స్టేడియానికి వస్తారని ముంబై ఇండియన్స్ యజమాని నీతా అంబానీ తెలిపారు.