Posted: 11/10/2012 03:23 PM IST

దాదాపు పదకొండు సంవత్సరాల తర్వాత భారత మాజీ కెప్టెన్ మహమ్మద్ అజరుద్దీన్‌కు మ్యాచ్ ఫిక్సింగ్ కేసు నుంచి ఊరట లభించింది. సరైన సాక్ష్యాధారాలు లేవంటూ ఆంధ్రప్రదేశ్ హైకోర్టు ఈ కేసును కొట్టేసి, అజర్‌ను నిర్దోషిగా పేర్కొంది. 2000 సంవత్సరంలో దక్షిణాఫ్రికా జట్టు అప్పటి కెప్టెన్ హన్సీ క్రానే నేతృత్వంలో భారత్‌లో పర్యటించినుప్పుడు మ్యాచ్ ఫిక్సింగ్ ఆరోపణలను ఢిల్లీ పోలీస్‌లు బైటపెట్టిన విషయం తెలిసిందే. బుకీలతో క్రానే తదితులు సాగించిన సంభాషణను ఢిల్లీ పోలీస్‌లు రికార్డు కూడా చేశారు.
        ఆతర్వాత చోటు చేసుకున్న పరిణామాల్లో అజర్ సహా వివిధ దేశాలకు చెందిన పలువురు క్రికెటర్లపై వేటు పడింది. కింగ్ కమిషన్ ముందు క్రానే వాంగ్మూలమిస్తూ చెప్పిన పేర్లు క్రికెట్ ప్రపంచాన్ని దిగ్భ్రాంతికి గురి చేశాయి. అజర్ కూడా ఫిక్సింగ్‌లో పాత్రధారేనంటూ క్రానే స్పష్టం చేయడంతో, భారత క్రికెట్ కంట్రోల్ బోర్డు (బిసిసిఐ) తక్షణమే స్పందించింది. అజర్‌తోపాటు అజయ్ శర్మపై కూడా జీవితకాల సస్పెన్షన్ వేటు వేసింది.
          కాగా, తనపై విధించిన జీవితకాల సస్పెన్షన్ చెల్లదంటూ ఆంధ్రప్రదేశ్ హైకోర్టులో అజర్ కేసు వేశాడు. పలు మలుపులు తిరుగుతూ వచ్చిన ఈ కేసులో గురువారం రాష్ట్ర హైకోర్టు తీర్పునిచ్చింది. నిషేధం చట్ట విరుద్ధమని స్పష్టం చేసింది. అజర్ మ్యాచ్ ఫిక్సింగ్‌కు పాల్పడినట్టు ఆధారాలు లేవని అతని తరఫు లాయర్ రమాకాంత్ రెడ్డి చేసిన వాదనతో అశుతోష్ మహంత, కృష్ణ మోహన్ రెడ్డిలతో కూడిన ధర్మాసనం ఏకీభవించింది. ఈ తీర్పు తనకు ఎంతో ఊరటనిచ్చిందని అజర్ పేర్కొన్నాడు.
      ఇదంతా ఒకెత్తయితే.. ఆ కేసు నమోదైన సమయంలో అజార్ చేసిన వ్యాఖ్యలు క్రీడాభిమానులను తీవ్ర ఆవేదనకు గురిచేశాయి. తాను మైనారిటీ వర్గానికి చెందిన వాడిని కాబట్టే ఇలాంటి కేసులు పెడుతున్నారని అజార్ చెప్పటం యావత్ భారతాన్ని దిగ్ర్భాంతికి గురిచేసింది. ఆతర్వాత రాజకీయల్లో చేరిన అజార్ ను ఆరోపణలను పక్కన పెట్టి భారత ప్రజలు పార్లమెంటుకు పంపిన సంగతి తెలిసిందే..

...avnk