Posted: 11/08/2012 01:38 PM IST

పట్టుదలతో శ్రమిస్తేనే విజయాలు సాధ్యమవుతాయని, తాను సాధించిన విజయాలకు కూడా ఇదే మూల సూత్రమని భారత స్టార్ షట్లర్, లండన్ ఒలింపిక్స్ కాంస్య పతక విజేత సైనా నెహ్వాల్ వ్యాఖ్యానించింది. . ఆమె రాసిన ‘ప్లేయింగ్ టు విన్ - మై లైఫ్ ఆన్ అండ్ ఆఫ్ కోర్ట్’ అనే పుస్తకం మార్కెట్లోకి విడుదల చేసిన సందర్భంగా షూటింగ్‌లో కాంస్య పతకాన్ని సాధించిన గగన్ నారంగ్‌తో కలిసి విలేఖరులతో ముచ్చటించింది. ఈ సందర్భంగా పుస్తకం రాసినందుకు కారణాలను వివరించింది. ‘ఆటోబయోగ్రఫీ అంటే రిటైర్మెంట్ తర్వాత, పెద్ద వయసులో రాయడం సాధారణంగా కనిపిస్తుంది. అయితే ఈ స్థాయికి చేరేందుకు నేను 13 ఏళ్ల పాటు తీవ్రంగా శ్రమించాను. నా అనుభవాల నుంచి యువ ఆటగాళ్లు నేర్చుకుంటారని, దానిని చెప్పేందుకు ఇదే సరైన సమయంగా భావించి రచయితగా మారాను’ అని తన మనసులో మాట వెల్లడించింది. మరో ఒలింపిక్ విజేత షూటర్ గగన్ నారంగ్ ‘ల్యాండ్‌మార్క్’ స్టోర్స్‌ లో బుక్ ఆవిష్కరించాడు. ప్రముఖ సంస్థ పెంగ్విన్ ఈ పుస్తకాన్ని ప్రచురించింది.
        ఇంకా సైనా ఏమందంటే.. క్రమశిక్షణతోనే ఉన్నత శిఖరాలను అందుకోవడం సాధ్యమని పేర్కొంది. ప్రతి విజయం తర్వాత ఐస్‌క్రీమ్ తినేదానినని, ఇప్పుడు ఫిట్నెస్‌ను కాపాడుకునే క్రమంలో ఆ అవకాశం లభించడం లేదని తెలిపింది. ఒక ప్రశ్నకు సమాధానమిస్తూ, ఉన్నత ప్రమాణాలతో కూడిన సౌకర్యాలు ఉంటే, అంతర్జాతీయ వేదికలపై భారత్ మరిన్ని పతకాలను సాధిస్తుందని తెలిపింది. యువతకు ఇచ్చే సందేశం ఏదైనా ఉందా? అని అడిగితే.. పట్టుదల, అంకిత భావం ప్రతి ఒక్కరికీ అత్యవసరమని పేర్కొంది. నిరంతర సాధనతోనే లక్ష్యాలను సాధించడం సాధ్యమవుతుందని తెలిపింది. ధ్యానం వల్ల ఒత్తిడి తగ్గుతుందని సైనా చెప్పింది.

...avnk