Posted: 07/07/2012 12:46 PM IST

భారత మాజీ కోచ్ గ్రెగ్ చాపెల్ చేసిన వ్యాఖ్యలను తాను పట్టించుకోనని టీమిండియా మాజీ కెప్టెన్ సౌరవ్ గంగూలీ స్పష్టం చేశాడు. ‘రాహుల్ ద్రవిడ్- టైమ్‌లెస్ స్టీల్’ అన్న పేరుతో రాసిన పుస్తకంలో చాపెల్ పలు సంచలన వ్యాఖ్యలు చేసిన విషయం తెలిసిందే. ద్రవిడ్ కెప్టెన్‌గా విజయాలు సాధించడం జట్టులోని కొంత మంది సీనియర్ క్రికెటర్లకు ఇష్టం లేదని, వారు అతనికి ఏమాత్రం సహకరించలేదని చాపెల్ తన పుస్తకంలో ఆరోపించాడు. సీనియర్ల మద్దతు ఉంటే ద్రవిడ్ అద్భుత విజయాలను సాధించి ఉండేవాడని పేర్కొన్నాడు. కాగా, ఈ వ్యాఖ్యలపై స్పందించడానికి గంగూలీ నిరాకరించాడు. చాపెల్ గురించి తాను మాట్లాడదలచుకోలేదని అన్నాడు. చాపెల్ ఆరోపణలను ద్రవిడ్ నమ్మడని చెప్పాడు. చాపెల్ ఇష్టానుసారంగా ఎలాంటి వ్యాఖ్యలైనా చేసుకోవచ్చని, వాటి గురించి మాట్లాడిన అవసరం తనకు లేదన్నాడు.