Posted: 07/07/2012 12:52 PM IST

టీమిండియా కెప్టెన్ మహేంద్ర సింగ్ ధోనీపై ఓపెనర్ వీరేందర్ సెవాగ్ మరోసారి సంచలన వ్యాఖ్యలు చేశాడు. వీరిద్దరి మధ్య చాలాకాలంగా ప్రచ్ఛన్న యుద్ధం కొనసాగుతున్న విషయం తెలిసిందే. ఒకరిపై మరొకరు బహిరంగంగానే విమర్శనాస్త్రాలు సంధించుకున్నారు. బిసిసిఐ అధికారుల జోక్యంతో పరిస్థితి కుదుటపడుతున్నదని అనుకుంటున్న సమయంలోనే సెవాగ్ మళ్లీ తన మాటల యుద్ధానికి తెరతీశాడు. 2007లో టి-20 ప్రపంచ కప్, 2011లో వరల్డ్ కప్ ట్రోఫీలను టీమిండియా సాధించడంలో ధోనీ పాత్రపై అడిగిన ప్రశ్నకు సమాధానమిస్తూ, బలమైన జట్టే కెప్టెన్‌కు వరమని వ్యాఖ్యానించాడు. ఈ రెండు సందర్భాల్లోనూ జట్టు పటిష్టంగా ఉందని, కాబట్టి వరల్డ్ కప్ విజయాన్ని ధోనీ ఒక్కడిదే కాదన్న విషయాన్ని గమనించాలని మాజీ వికెట్‌కీపర్ సాబా కరీం నిర్వహిస్తున్న ‘జెనిసిస్ ప్రొ-క్రికెట్ సెంటర్’కు వచ్చిన సందర్భంగా విలేఖరులతో మాట్లాడుతూ సెవాగ్ వ్యాఖ్యానించాడు. ధోనీకి బలమైన జట్టు అండగా ఉందని చెప్పాడు.

అలాంటి జట్టు ఉంటే కెప్టెన్ ఎవరైనా ఉత్తమ ఫలితాలనే రాబడతాడని అన్నాడు. ధోనీ నాయకత్వానికి జట్టు మొత్తం మద్దతు పలికిందని పేర్కొన్నాడు. కాబట్టి, ప్రపంచ కప్ విజయాన్ని ధోనీ ఒక్కడి ఘనతగా అనుకోరాదని అన్నాడు. ఒక ప్రశ్న సమాధానమిస్తూ, ఈనెల 21 నుంచి ప్రారంభం కానున్న శ్రీలంక టూర్‌కు తాను సిద్ధంగా ఉన్నానని చెప్పాడు. తనకు ఫిట్నెస్ సమస్యలు ఏవీ లేదని స్పష్టం చేశాడు. వెస్టిండీస్ పర్యటనలో భారత ‘ఎ’ జట్టు అనుకున్న స్థాయిలో రాణించలేకపోయిందని వ్యాఖ్యానించాడు. కొంతమంది సీనియర్లు కూడా అలాంటి జట్టులో ఉంటే బాగుంటుందని సూచించాడు. తా టీమిండియాలో కీలక సభ్యుడిగా కొనసాగుతున్న రోజుల్లో కూడా భారత్ ‘ఎ’ తరఫున పర్యటించానని గుర్తుచేశాడు. దీనివల్ల తగినంత ప్రాక్టీస్ లభిస్తుందని, యువ క్రికెటర్లకు అవసరమైన సూచనలు, సలహాలు ఇవ్వడం సాధ్యమవుతుందని సెవాగ్ పేర్కొన్నాడు. టెస్టు క్రికెట్‌కు ఆదరణ తగ్గుతున్నదని మాజీ కెప్టెన్ రాహుల్ ద్రవిడ్ చేసిన వ్యాఖ్యలను సెవాగ్ తోసిపుచ్చాడు. క్రికెటర్లు చాలా మంది వనే్డ, టి-20 ఫార్మెట్స్ నుంచి రిటైరైనప్పటికీ టెస్టుల్లో కొనసాగడాన్ని గమనించవచ్చని చెప్పాడు. కానీ, టెస్టులకు గుడ్‌బై చెప్పి వనే్డ లేదా టి-20 ఫార్మెట్స్‌లో ఆడుతున్న వారు ఉండరని అన్నాడు.

ఏ టూర్‌లో పాల్గొనాలి? ఏ టూర్ నుంచి విశ్రాంతి తీసుకోవాలి? అన్న విషయాల్లో సొంత నిర్ణయం తీసుకునే అవకాశం మాస్టర్ బ్లాస్టర్ సచిన్ తెండూల్కర్‌కు ఇవ్వాల్సిందేనని సెవాగ్ పేర్కొన్నాడు. భారత క్రికెట్‌కు అపారమైన సేవలు అందించిన 39 ఏళ్ల సచిన్‌కు ఎప్పుడు ఏ టూర్ నుంచి విశ్రాంతి తీసుకోవాలో బాగా తెలుసునని వ్యాఖ్యానించాడు. న్యూజిలాండ్‌తో జరిగే టెస్టు సిరీస్‌కు అతను అందుబాటులో ఉంటాడని సెవాగ్ ఆశాభావం వ్యక్తం చేశాడు.