Posted: 01/28/2012 07:43 PM IST

ఆస్ట్రేలియన్ ఓపెన్ మహళల సింగిల్స్ టైటిల్‌ను బెలారస్ క్రీడాకారిణి విక్టోరియా అజరెంకా కైవసం చేసుకుంది. ఫైనల్లో అజరెంకా 6-3 , 6-0 తేడాతో రష్యా అందాల భామ మరియా షరపోవాపై విజయం సాధించింది. తద్వారా కెరీర్‌లో తొలి గ్రాండ్‌శ్లామ్ గెలుచుకుంది. అలాగే ఆస్ట్రేలియన్ ఓపెన్ నెగ్గిన తొలి బెలారస్ క్రీడాకారిణిగా చరిత్ర సృష్టించింది.ఫైనల్లో షరపోవానే ఫేవరెట్‌గా భావించినప్పటకీ ఆమె ఏ మాత్రం పోటీనివ్వలేకపోయింది. తొలి సెట్ గెలిచేందుకు 46 నిమిషాలు తీసుకున్న బెలారస్ బ్యూటీ... రెండో సెట్‌ను కేవలం 29 నిమిషాల్లోనే ముగించింది. ఈ విజయంతో అజరెంకా వరల్డ్ ర్యాంకింగ్స్‌లో అగ్రస్థానాన్ని కూడా అందుకుంది. టైటిల్‌తో పాటు ఆమెకు 11.5 కోట్ల ప్రైజ్‌మనీ దక్కింది.

ఇక పురుషుల ఆస్ట్రేలియన్ ఓపెన్ డబుల్స్ విజేతగా లియాండర్ పేస్ జోడీ నిలిచింది. నెంబర్ వన్ సీడ్ కు పేస్ జోడీ షాక్ ఇచ్చింది. ఫైనల్స్ లో బ్రయాన్ బ్రదర్స్ పై 7-6, 6-2 తేడాతో పేస్-జపానెక్ జా విజయం సాధించారు. లియాండర్ పేస్ ఖాతాలో ఇది 13వ గ్రాండ్ స్లామ్ టైటిల్. పేస్ 7 డబుల్స్, 6 మిక్స్ డ్ డబుల్స్ టైటిల్స్  గెలుచుకున్నాడు.