Posted: 01/28/2012 07:54 PM IST

సెలబ్రిటీ క్రికెట్ లీగ్ సెకండ్ సీజన్‌లో టాలీవుడ్ టీమ్ న్యూజెన్ తెలుగు వారియర్స్ అదరగొడుతోంది. బెంగళూర్‌లో జరిగిన మ్యాచ్‌లో వారియర్స్ 9 వికెట్ల తేడాతో కేరళ స్ట్రైకర్స్‌పై ఘనవిజయం సాధించింది. టోర్నీలో వెంకీ గ్యాంగ్‌కు ఇది వరుసగా రెండో విజయం. టాస్ గెలిచిన వారియర్స్ కెప్టెన్‌ వెంకటేష్ ఫీల్డింగ్ ఎంచుకున్నాడు. కేరళ ఓపెనర్లు ధాటిగా ఇన్నింగ్స్ ఆరంభించినప్పటకీ ఐదో ఓవర్‌ నుండీ టాలీవుడ్ టీమ్ బౌలర్లు వారిని కట్టడి చేశారు. ముఖ్యంగా బౌలర్ నంద కిషోర్ , ఆల్‌రౌండర్ చరణ్‌తేజ్ వరుస వికెట్లు తీసి స్ట్రైకర్స్‌ను కుప్పకూల్చారు. దీంతో కేరళ జట్టు 20 ఓవర్లలో 9 వికెట్లకు 94 పరుగులు చేసింది. నందకిషోర్ 4 , చరణ్‌తేజ్ 3 వికెట్లు తీసుకున్నారు. 95 పరుగుల టార్గెట్‌తో బరిలోకి దిగిన వారియర్స్ ఆరంభం నుండే అదరగొట్టింది. ఓపెనర్ తారకరత్న త్వరగానే ఔటైనప్పటకీ... మరో ఓపెనర్ ఆదర్శ్ , తరుణ్ జట్టును గెలిపించారు. ఆదర్శ్ బౌండరీ కొట్టి జట్టుకు విజయాన్నందించడంతో పాటు హాఫ్ సెంచరీ పూర్తి చేసుకున్నాడు. తరుణ్ 27 , ఆదర్శ్ 52 పరుగులతో నాటౌట్‌గా నిలిచారు. ఈ విజయంతో తెలుగు వారియర్స్ ఫైనల్‌కు చేరువైంది.