ఎన్టీఆర్ సినిమాకు నిర్మాతగా మెగాపవర్ స్టార్.?

Posted: 09/22/2018 01:31 PM IST

Jr ntr new movie in ram charan s konidela productions banner

తెలుగు చలనచిత్రసీమలో అగ్రహీరోలుగా కొనసాగుతున్న యువహీరోలందరి మద్య మంచి సన్నిహిత్యం వుందని ఇప్పటికే చాలా సందర్భాలలో విన్నాం. ఒకరి సినిమాలకు మరోకరు ప్రమోట్ చేయడంతో పాటు సినిమాలో వాయిస్ ఓవర్లు ఇత్యాదులకు కూడా సహకరించుకుంటారు. ఈ క్రమంలో ఇక నిర్మాతల అవతారం ఎత్తిన హీరోలు.. తమ స్నేహితులను కూడా తమ బ్యానర్ చిత్రాలలో నటించేందుకు కూడా రెడీ అవుతున్నారు.

ఈ ఒరవడికి అద్యులు ఎవరన్న విషయం తెలియదు కానీ.. హీరో నితిన్ తన స్నేహితుడు అఖిల్ తొలిచిత్రానికి నిర్మాతగా వ్యవహరించారు. రాజ్ తరుణ్ చిత్రాలకు మంచు బ్యానర్, ఇలా కొన్ని చిత్రాలు వచ్చి హిట్లుగా కూడా మారాయి. అయితే తాజాగా అగ్రహీరోలలో కూడా ఈ తరహా స్నేహపూర్వక వాతావరణం ఏర్పడటం తెలుగుచిత్రసీమకు శుభదాయకం అని అంటున్నారు విశ్లేషకులు. ఈ తరుణంలో మెగాపవన్ స్టార్ రాం చరణ్ తేజ్ ఓ వైపు హీరోగా, మరోవైపు నిర్మాతగా కూడా వ్యవహరిస్తున్న విషయం తెలిపిందే.

కొణిదెల ప్రొడక్షన్స్ పేరుతో సొంత బ్యానర్ ను ఏర్పాటు చేసుకున్న చెర్రీ.. తన బ్యానర్లో తొలి సినిమాగా తన తండ్రి మెగాస్టార్ చిరంజీవి రీఎంట్రీకి తలుపులు తెరిచారు. 'ఖైదీ నెంబర్ 150'తో ప్రేక్షకుల ముందుకు వచ్చిన ఈ చిత్రం భారీ వసూళ్లను సాధించింది. దాంతో రెండవ సినిమాగా 200 కోట్లకి పైగా బడ్జెట్ తో చరణ్ 'సైరా' సినిమాను నిర్మిస్తున్నాడు. ఇక ఈ బ్యానర్లో మూడవ సినిమా ఎన్టీఆర్ తో ఉంటుందనేది తాజా సమాచారం.

తన బ్యానర్లో బయట హీరోలతో కూడా సినిమాలు చేస్తానని చరణ్ ముందుగానే చెప్పాడు. అన్నట్టుగానే ఆయన ఎన్టీఆర్ తో ఒక సినిమాను ప్లాన్ చేస్తున్నట్టుగా సమాచారం. చరణ్ ఈ సినిమాకి నిర్మాతగా మాత్రమే వ్యవహరిస్తాడట. అంటే ఎన్టీఆర్ హీరోగా మాత్రమే ఈ సినిమా రూపొందనుంది. ఎన్టీఆర్ .. చరణ్ మంచి స్నేహితులు, అందువల్లనే తన బ్యానర్లో చేయమని చరణ్ అడగ్గానే ఎన్టీఆర్ ఓకే అనేశాడని చెప్పుకుంటున్నారు. త్వరలో ఈ విషయంలో స్పష్టత వచ్చే అవకాశం వుంది. ఇక ఈ ఇద్దరూ కలిసి రాజమౌళి మూవీ చేయనున్న సంగతి తెలిసిందే.