జూనియర్ కు అమ్మగా శ్రీదేవి.. నిజమేనా?

Posted: 06/30/2017 04:33 PM IST

ఇంగ్లీష్ వింగ్లీష్ తో చాలా గ్యాప్ తర్వాత మేకప్ వేసుకున్న శ్రీదేవి స్క్రిప్ట్ ల ఎంపికలో చాలా డిలే చేస్తూ వస్తోంది. మధ్యలో విజయ్ పులి అంటూ కోలీవుడ్ లో చేసిన సినిమా డిజాస్టర్ గా మారింది. ఎట్టకేలకు కాస్త గ్యాప్ తో మామ్ అనే ఉమెన్ సెంట్రిక్ సబ్జెక్ట్ తో మళ్లీ బాలీవుడ్ ను పలకరించబోతుంది. అయితే సెకండ్ ఇన్నింగ్స్‌లో అలనాటి అందాల సుంద‌రి మెల్లిగా జోరు పెంచుతున్నట్లు స్పష్టమౌతోంది.

ఓవైపు `మామ్‌` విడుద‌లకాక ముందే బాలీవుడ్ లో మ‌రో సినిమాకు సంత‌కం చేసిన‌ట్లు తెలుస్తుండగా, ఇప్పుడు మరో క్రేజీ న్యూస్ వైరల్ అవుతోంది. మహేష్ తో భరత్ అను నేను తర్వాత దర్శకుడు కొరటాల శివ మళ్లీ ఎన్టీఆర్ తో ఓ మూవీ ఫ్లాన్ చేసిన విషయం తెలిసిందే. సుధా ఆర్ట్స్ బ్యానర్ పై సినిమా ఉండబోతుందని తారక్ పుట్టిన రోజు సందర్భంగా ఓ పోస్టర్ ను కూడా వదిలారు. ఆ సినిమాలో ఓ క్యారెక్టర్ కోసం శ్రీదేవితో చర్చలు మొదలుపెట్టినట్లు సమాచారం. అయితే అది అత్తగా కాకుండా అమ్మ గా అనే టాక్ వినిపిస్తోంది.

స్టోరీ లైన్ విన్న శ్రీదేవి పూర్తి కథతో రావాలని, బాగా నచ్చితేనే నటిస్తానని చెప్పినట్లు తెలుస్తోంది. దీంతో కొరటాల ఓవైపు భరత్ అను నేను షూటింగ్ లో పాల్గొంటూనే పూర్తి కథను రెడీ చేసే పనిలో ఉన్నాడంట. అదే జరిగితే చాలా గ్యాప్ తర్వాత టాలీవుడ్ లో శ్రీదేవి నటించటమే కాదు.. ఎప్పటి నుంచో శ్రీదేవితో నటించాలన్న జూనియర్ కోరిక తీరినట్లే. ప్రస్తుతానికైతే ఎన్టీఆర్ బాబీ జై లవకుశలో నటిస్తుండగా, శ్రీదేవి 300వ చిత్రం మామ్ రిలీజ్ కు రెడీగా ఉంది.