రవితేజ సోదరుడిని మోసం చేసిన డైరక్టర్?

Posted: 06/28/2017 02:31 PM IST

సినీ నటుడు భరత్ టాలీవుడ్ లో విషాదం నింపటం మాట అటుంచి, సోదరుడు రవితేజ సహా కుటుంబ సభ్యులెవరూ దగ్గరికి తీసుకోకపోవటం పెద్ద చర్చకే దారితీసింది. పైగా బాధను దిగమింగి షూటింగ్ కు హాజరవుతున్నాడంటూ కొన్ని హెడ్డింగులు దర్శనమిస్తున్నాయి. అయితే కారణాలేవైనా ఓ వర్థమాన నటుడు అర్థాంతరంగా ప్రాణాలు వదలటం మాత్రం టాలీవుడ్ లో శోకం నింపిందనే చెప్పుకోవాలి.

ఇక భరత్ రవితేజ సోదరుడిగానే ఇండస్ట్రీలో అడుగుపెట్టిన విషయం తెలిసిందే. సినిమాలకు రాక ముందు ఇంటి వ్యవహారాలు చూసుకునేవాడని, సోదరుడు హీరో అయ్యాక అతని వ్యవహారాలు, ఆస్తులను చక్కబెట్టేవాడని చెప్పుకున్నారు. ఆపై సోదరుడి రిఫెరెన్స్ మీద సినిమాలకు వచ్చాడన్నది ఇప్పటి దాకా చెప్పుకున్నాం. అయితే అందులో వాస్తవం లేదన్న టాక్ ఇప్పుడు వినిపిస్తోంది.

పెళ్లాయ్యాక భరత్ ఉద్యోగం చేసుకుంటూ తన భార్యతో యూఎస్ లో ఉండేవాడంట. ఓసారి తానా సభల సందర్భంగా అక్కడికి వెళ్లిన ఓ స్టార్ డైరక్టర్ భరత్ ను చూసి.. మీ బ్రదర్ లాగే ఉన్నారు. మీరూ సినిమాలో ట్రై చేయొచ్చుగా అన్నాడంట. అయితే సినిమాల్లో నటించాలనే కోరిక లేనప్పటికీ, ఆ దర్శకుడు పదే పదే బలవంతం చేయటంతో భార్యను దూరం పెట్టి మరీ చివరకు ఇండియాకు వచ్చేశాడు. తీరా హైదరాబాద్ వచ్చాక హీరో కాదు కదా చిన్న క్యారెక్టర్ వేషం కూడా ఇప్పించలేదంట. ఆపై మెల్లిగా అన్న పేరు చెప్పుకుని చిన్న చిన్న వేషాలు.. క్రమంగా అవీ తగ్గిపోవటం, ఆర్థిక సమస్యలు.. భరత్ డిప్రెషన్ లోకి వెళ్లిపోయి.. మద్యానికి, డ్రగ్స్ కు బానిస అయ్యాడని సన్నిహితులు చెబుతున్నారు. ఆ డైరక్టర్ ఎవరన్న విషయాన్ని మాత్రం చెప్పేందుకు వారు నిరాకరించారు.