‘సర్దార్ గబ్బర్ సింగ్’ విడుదలకు నోటీసులు

Posted: 03/31/2016 03:26 PM IST

Arbaaz khan legal notices to sardaar gabbar singh

పవర్ స్టార్ పవన్ కళ్యాణ్ నటిస్తున్న ‘సర్దార్ గబ్బర్ సింగ్’ చిత్రం ఏప్రిల్ 8న ప్రపంచ వ్యాప్తంగా తెలుగు, హిందీ భాషలలో విడుదల కానుందని చిత్ర యూనిట్ అధికారికంగా ప్రకటించారు. మరికొద్ది రోజుల్లో విడుదల కానున్న ఈ చిత్రానికి తాజాగా లీగల్ నోటీసులు అడ్డుగా నిలుస్తున్నాయి. ‘సర్దార్ గబ్బర్ సింగ్’ చిత్రానికి బాలీవుడ్ స్టార్ హీరో సల్మాన్ ఖాన్ సోదరుడు అర్భాజ్ ఖాన్ నుంచి లీగల్ నోటిసులు వచ్చాయి.

‘సర్దార్ గబ్బర్ సింగ్’ హిందీ వర్షెన్ విడుదలను ఆపివేయాలని ఆ నోటీసులో వున్నట్లుగా సమాచారం. తమ సినిమాను కాపీ కొట్టారని, అందువల్ల తగిన చర్చ తీసుకోవాలని ఆ నోటిసులో వున్నట్లుగా తెలిసింది. ఈ విషయంపై బాలీవుడ్ మీడియాలో ‘సర్దార్ గబ్బర్ సింగ్’పై రకరకాల కథనాలు మొదలయ్యాయి. కానీ ఈ విషయంపై అటు అర్భాజ్ ఖాన్ కానీ, ‘సర్దార్ గబ్బర్ సింగ్’ హిందీ నిర్మాతలు ఈరోస్ వారు కానీ ఏ విధంగా కూడా స్పందించడం లేదు.

కానీ ‘సర్దార్ గబ్బర్ సింగ్’కు ఎందుకు నోటీసులు పంపించారనే విషయంపై స్పష్టమైన ఆధారం లేదు. అర్భాజ్ ఖాన్ నిర్మించిన ‘దబాంగ్’ చిత్రానికి రీమేక్ గా కానీ, కొనసాగింపుగా ‘సర్దార్ గబ్బర్ సింగ్’ వుందనుకొని ఈ లీగల్ నోటీసులు పంపించి వుండవచ్చని సినీవర్గాల అంచనా. అలాగే గతకొద్ది కాలంగా ఈరోస్ సంస్థతో అర్భాజ్ ఖాన్ తో రిలేషన్స్ బాగోలేని కారణంగానే... ఇలా నోటీసులు పంపించారంటూ వార్తలు వినిపిస్తున్నాయి. అయితే ఈ విషయంపై పవన్ కళ్యాణ్ స్వయంగా నిర్ణయం తీసుకునే అవకాశాలున్నట్లుగా సినీవర్గాల సమాచారం. మరి ఏం జరుగనుందో చూడాలి.