భారీ బడ్జెట్ తో ‘సర్దార్ గబ్బర్ సింగ్’ ఆడియో విడుదల?

Posted: 02/16/2016 10:25 AM IST

పవర్ స్టార్ పవన్ కళ్యాణ్ ‘సర్దార్ గబ్బర్ సింగ్’ కోసం అభిమానులు ఎంతగానో ఎదురుచూస్తున్న విషయం తెలిసిందే. ఇప్పటికే విడుదలైన ఫస్ట్ లుక్ టీజర్లకు భారీ రెస్పాన్స్ వచ్చింది. ఈ చిత్ర ఆడియో విడుదల కోసం అభిమానులు ఎంతో ఆతృతగా ఎదురుచూస్తున్నారు. రాక్ స్టార్ దేవిశ్రీప్రసాద్ సంగీతం అందిస్తున్నాడు.

ఇప్పటికే పవన్ కళ్యాణ్-దేవిశ్రీప్రసాద్ ల కాంబినేషన్లో ‘జల్సా’, ‘గబ్బర్ సింగ్’, ‘అత్తారింటికి దారేది’ వంటి వరుస బ్లాక్ బస్టర్ హిట్ చిత్రాలొచ్చాయి. ఈ హ్యట్రిక్ హిట్స్ తర్వాత వస్తున్న ఈ ‘సర్దార్ గబ్బర్ సింగ్’ సినిమా ఆడియో మరో సంచలనం కానుందని అభిమానులు ధీమాతో వున్నారు. అయితే ఈ చిత్ర ఆడియోను మార్చి 12న గ్రాండ్ గా, హైదరాబాద్ లోని గచ్చిబౌలిలో అభిమానుల సమక్షంలో విడుదల చేయనున్నట్లుగా తెలిసింది.

ఈ ఆడియో వేడుక కోసం కోటి పాతిక లక్షలు బడ్జెట్ కేటాయించినట్లుగా తెలిసింది. ఇప్పటికే ఈ సినిమాకు భారీ డిమాండ్ ఏర్పడటం, పైగా ఓవర్సీస్, డిస్ట్రిబ్యూషన్ రైట్స్ కోసం భారీగా పోటీ ఏర్పడటంతో ‘సర్దార్ గబ్బర్ సింగ్’ పై భారీ అంచనాలే నెలకొన్నాయి. దీంతో ఆడియో వేడుకకు ఆ మాత్రం గ్రాండ్ గా వుండాలని నిర్మాతలు భావిస్తున్నట్లుగా తెలిసింది. ఈ ఆడియో వేడుకలో మెగా ఫ్యామిలీకి చెందిన చిరంజీవి, నాగబాబు, అల్లు అర్జున్, రాంచరణ్, సాయిధరమ్ తేజ, వరుణ్ తేజ, నిహారికలు పాల్గొననున్నట్లుగా తెలిసింది.

పవర్’ ఫేం బాబీ దర్శకత్వంలో నార్త్ స్టార్ ఎంటర్ టైన్మెంట్స్ ప్రై.లిమిటెడ్ బ్యానర్, పవన్ కళ్యాణ్ క్రియేటివ్ వర్క్స్ బ్యానర్లపై నిర్మాత శరత్ మరార్ నిర్మిస్తున్నారు. హై వోల్టేజ్ యాక్షన్ ఎంటర్ టైనర్ గా రూపొందుతున్న ఈ సినిమాలో పవన్ సరసన కాజల్ హీరోయిన్ గా నటిస్తుంది. అలాగే రాయ్ లక్ష్మీ ఓ కీలక పాత్రలో నటిస్తోంది. భారీ అంచనాలతో తెరకెక్కుతున్న ఈ చిత్రాన్ని ఏప్రిల్ నెలలో విడుదల చేయబోతున్నట్లుగా ఇప్పటికే అధికారికంగా ప్రకటించేసారు.